Moti i keq me reshje të dendura shiu dhe erë të fortë “paralizoi” ditën e djeshme Shqipërinë, me Veriun e vendit që u godit më rëndë nga përmbytjet edhe për shkak të hapjes së portave të shkarkimit në tre HEC-et kryesore.
Por ngjarja më e rëndë u shënua në Shkodër, aty ku ujërat e përroit Shkrel të Malësisë së Madhe morën përpara makinën me të cilën udhëtonte 48-vjeçari Pjetër Rrushaj, së bashku me dy fëmijët e tij 13 dhe 17 vjeç.
Policia pasi shkoi në vendngjarja konstatoi se vajza 17-vjeçare ka mundur të shpëtojë, ndërsa pas 16 orësh kërkime Blutë e Shkodrës kanë njoftuar se Pjetër Rrushaj dhe i biri Jason Rrushaj janë gjetur të pajetë në rrjedhën e ujit.
Kërkimi për ta nga ana e forcave të specializuara nisi prej ditës së djeshme. Në terren u angazhuan edhe polumbarët e RENEA-s, grupi alpin i FNSH-ve të Shkodrës dhe 40 banorë nga zona e Thethit.
Njoftimi i policisë:
Në vijim të informacion të dhënë mesditën e djeshme se në vendin e quajtur “Grykë Lugje”, në njësinë administrative Shkrel, Malësi e Madhe, rrjedha e ujit të përroit kishte marrë përpara një automjet me të cilin udhëtonin tre persona, banorë të zonës. (babai, djali dhe vajza), ju bëjmë me dije se:
Pas 16 orë kërkimesh intensive, gjatë pasdites së djeshme, gjatë natës dhe gjatë mëngjesit të sotëm, nga polumbarët e RENEA-s, grupi i evakuim-shpëtimit, grupi alpin i FNSH Shkodër, emergjencat civile dhe shërbimet e Komisariatit të Policisë Malësi e Madhe, në gjatësinë e përroit, në Bogë, u bë e mundur gjetja e dy trupave (babë e bir).
