Tërheqja e klubeve të Teutës dhe Tiranës nga Liga Unike në basketboll për meshkuj, ka sjellë edhe pezullimin e përkohshëm të aktivitetit të këtij edicioni. Kampionati i ideuar si bashkëpunim mes Kosovës dhe Shqipërisë, ka vazhduar për femra por jo për meshkuj.
Për këtë ngjarje sot ka reaguar edhe KOKSH, nëpërmjet një deklarate të presidentit Fidel Ylli i cili ka dënuar vendimin në fjalë të dy klubeve, duke u kujtuar se kjo Ligë Unike ishte krijuar me insistimin e fortë të të dy shteteve, teksa ato financoheshin pikërisht nga buxheti i shtetit shqiptar.
“Në një kohë kur qeveria Rama po mbështet fuqishëm zhvillimin e sportit të volejbollit dhe basketbollit, dy klube që financohen tërësisht nga buxheti i shtetit, vendosin të largohen në mënyrë të njëanshme nga veprimtari zyrtare ndërkombëtare”, shkruhej ndër të tjera në komunikatën e Fidel Yllit si paralajmërim për Teutën dhe Tiranën.
“SI president i KOKSH, i bëj apel të dy klubeve dhe bashkive përkatëse të rishikojnë me qetësi vendimet e tyre dhe problemet e brendshme t’i zgjidhin në mënyrë institucionale dhe jo me pasoja për të tjerët”, shkruhej në këtë komunikatë.
