Nënkryetari i Partisë së Lirisë Endrit Braimllari ka përkujtuar këtë të enjte (17 nëntor), çlirimin e kryeqytetit.
Braimllari deklaron se sot Tirana gjendet sërish e pushtuar nga sekti i Rilindjes i cili ka marre peng të ardhmen e kryeqytetit.
“Në mëngjesin e 17 nëntorit të vitit 1944, pas 19 ditë e net luftë të ashpër e të pandërprerë, kryeqyteti i Shqipërisë, Tirana, u çlirua. Operacioni mësymës për çlirimin e Tiranës u përgatit dhe u zhvillua në kuadrin e mësymjes së përgjithshme të UNÇSH-së për çlirimin e plotë të Shqipërisë”. Forcat Partizane të mbështetur masivisht nga qytetarët e Tiranës çliruan kryeqytetin e Shqipërisë. Nderim dhe mirënjohje për të gjithë të rinjtë dhe të rejat qe i’u bashkuan sakrificës për një Tiranë të çliruar dhe europiane. Sot Tirana gjendet sërish e pushtuar nga sekti i Rilindjes i cili ka marre peng të ardhmen e kryeqytetit”, shkruan në FB, Braimllari.
Nënkryetari i PL-së shkruan se Tirana sot është kthyer në burimin e pastrimit të parave të pista, kullat shumëkatëshe i kanë zënë vendin parqeve dhe gjelbërimit dhe se 14 maji do të jetë beteja për demokraci dhe llogaridhënie.
“Tirana sot është kthyer ne burimin e pastrimit të parave të pista, kullat shumëkatëshe i kanë zënë vendin parqeve dhe gjelbërimit. Institucionet e bashkisë Tiranë janë kthyer në struktura gjobvënëse në kurriz të qytetarëve dhe biznesit në Tiranë. 14 maj do të jetë beteja e të rinjve të Tiranës për ta çliruar kryeqytetin nga pengmarrja e Erion Veliaj dhe për t’ia kthyer qytetarëve. 14 maj do të jetë beteja për demokraci dhe llogaridhënie”, përfundon Braimllari.
