Mesfushori kroat Marselo Brozoviç është një nga pikat kyçe të Interit dhe të kombëtares kroate, dhe dëmtimi i tij mbajti në ankth për shumë kohë të dyja skuadrat.
“Kombëtarja nuk do të ishte e njëjtë pa Brozoviçin”, ishte shprehur trajneri Zlatko Daliç dhe rikuperimi në kohë për Botërorin ishte një lajm fantastik për ballkanasit.
Në konferencën para ndeshjes, në krah të trajnerit Daliç, lojtari i Interit ka treguar gjithë gatishmërinë e tij për të qenë nën urdhrat e teknikut kroat.
“Unë kam zbritur tashmë në fushë me Interin dhe kam grumbulluar disa minuta në dy ndeshjet e fundit. Mund të luaj më shumë që nesër (sot) dhe nëse më lejon trajneri mendoj se mund t’i përballoj 70- 75 minuta në fushë”, është shprehur për formën e tij aktuale Brozoviç, duke u ndalur më pas edhe te ditët e fundit të përgatitjeve.
“Do të kemi këtë test ndaj Arabisë Saudite para nisjes zyrtare të Botërorit dhe pas tij do të kemi ende disa ditë për të përgatitur debutimin tonë.Aty ama synoj të jem në maksimumin e formës sime, të jem në gjendje të luaj të gjitha ndeshjet me minutazh të plotë. Dua të jem në 100%-shin tim, por jam i sigurt që kushdo që të luajë do të japë më të mirën e tij për kombëtaren.Synojmë që këto ditë të përgatitemi në mënyrën më të mirë dhe pastaj të shohim si do të na shkojë në grupe, ku pretendimet tona padyshim që janë të larta”, është shprehur mesfushori kroat i Interit që do të përballet në grupe me Belgjikën, Marokun e Kanadanë.
