Policia ka identifikuar gruan e cila u konfliktua ditën e djeshme me një të moshuar pasi po kalonte në vijat e bardha. Shoferja ka shkelur kështu edhe rregullat e qarkullimit pasi nuk i dha përparësi këmbësorit në vijat e bardha.
Policia ka shoqëruar B.R., 46 vjeçe, në komisariat dhe u vendos masa administrative, në bazë të Kodit Rrugor, për mosdhënie përparësie këmbësorëve. Gjithashtu u bë bllokimi i automjetit tip “Benz”.
“Në lidhje me një video të postuar në portale, në të cilën shfaqet një shtetase që ka ndaluar automjetin në vija të bardha dhe nuk respekton rregullat e qarkullimit rrugor (mosdhënie përparësie këmbësorëve), ju sqarojmë se:
Shërbimet e Policisë, menjëherë pas publikimit të pamjeve filmike, organizuan punën për identifikimin e drejtueses së automjetit që shfaqet në video. Specialistët e Qarkullimit Rrugor kanë lokalizuar automjetin dhe kanë shoqëruar drejtuesen e tij, shtetases B. R., 46 vjeçe.
Në vijim të veprimeve u bë bllokimi i automjetit tip “Benz”, ndërsa për drejtuesen e automjetit u vendos masa administrative, në bazë të Kodit Rrugor, për mosdhënie përparësie këmbësorëve.“- njofton Drejtoria Vendore e Policisë Tiranë.
