Kryeministri Edi Rama i është rikthyer sërish të flasë për Ballkanin e Hapur duke thënë se kjo nismë i jep më shumë mundësi vendeve të rajonit të bashkëpunojnë njëra me tjetrën.
Në mbledhjen e dy qeverive në Shkup, Rama na bëri të kuptojmë se nuk do të heqë dorë nga nisma e tij dhe Vuçiçit të emëruar “Ballkani i Hapur”. Rama tha se rezultatet kane qenë të mira, ndërsa shtoi faktin se ky proces nuk e përjashton “Procesin e Berlinit” nismën që mbështete nga Gjermania e kancelarit Scholz.
“Shqipëria dhe Maqedonia e Veriut kanë bërë një farë përgatitje duke u përpjekur të projektohen në të ardhmen jo thjesht në mënyrë individuale si shtete me vete por edhe në mënyrë kolektive si vende të së njëjtës zonë gjeografike dhe gjeopolitike qoftë në aspektin e rajonit qoftë në BE. Ballkani i Hapur na ka dhënë shumë mundësi të reja për të parë përtej se djeshmes, për të kuptuar si mund ta kapërcejmë të sotmen dhe për të projektuar një të ardhme që të rrisë në maksimum aftësinë e vendeve tona që të përfitojnë në një hapësirë më të madhe se hapësira jonë e përveçme gjeografike. Kemi parë rezultate të mira të marrëveshjeve të bëra. Jemi mbështetës të palëkundur të Procesit të Berlinit, duke pasur aftësinë t’i shohim këto nisma si pjesë të njëra tjetrës dhe jo si përjashtuese të njëra-tjetrës”, tha Rama.
Kujtojmë që disa ditë më parë Edi Rama së bashku me 5 liderët e tjerë të rajonit me ftesë të kancelarit Scholz vizituan Berlinin për të çuar përpara nismën e Merkelit për “Procesin e Berlinit”.
Këtë të hënë të 14 nëntorit, në Shkup mbahet mbledhja e përbashkët e qeverisë së Shqipërisë dhe asaj të Maqedonisë së Veriut ku janë firmosur disa marrëveshje të rëndësishme.
