Teuta nuk arriti të fitojë me Bylisin në “Adush Muça”. Mbrojtësi i Teutës, Blerim Kotobelli qëndron me “këmbë në tokë” për sa u përket ndeshjeve dhe rezultateve.
Kotobelli, në një intervistë për “Panorama Sport”, thotë se skuadra duhet të mos entuziazmohet shumë dhe se ndeshja me Erzenin do vlerësim maksimal dhe do të duhet të marrë pikët.
Mbrojtësi i majtë shprehet se kjo ishte një shenjë e mirë, pasi ekipi tregoi që ka rritje. Kotobelli tregohet altruist jo vetëm në fushë, por dhe kur pyetet për ndeshjen ndaj Erzenit sipas tij rëndësi ka që ekipi te marrë fitoren, ndërsa statistikat vlejnë për aspektin personal.
Vetëm barazim ndaj Bylisit, mendoni se meritonin më shumë?
Ndeshja nisi mirë për ne, që shpërdoruam disa raste, por normale që na vjen keq që nuk arritëm të shënonim. Në fraksionin e parë edhe kundërshtari kishte shanset e tyre. Dhe në pjesën dytë hymë në fushë më të motivuar dhe arritëm të krijonim, por që nuk fituam gjë që do të na jepte akoma më shumë qetësi për vijimësinë.
Ndeshje me grintë në anën personale?
Unë jap 110 për qind, si 1 minutë si 90 minuta. Realisht bëra një ndeshje të mirë, por nuk duhet të kënaqem me kaq, vijimësia është ajo që vlen. Ta harrojmë ndeshjen me Bylisin. Ky grup është rritur shumë dhe duhet respekt, shpresojmë të bëjmë mirë edhe ndaj Erzenit.
Tashmë morali i skuadrës është i mirë ndaj Erzenit, synohen tri pikët?
Janë dy gjëra që duken të ndara nga njëra-tjetra. Psikologjikisht, na bën mirë si ekipi, pasi tregoi reagimin që prisnim. Treguam rritje goxha të madhe, por duhet të fitojmë rresht që të na japin disi moral. Duhet të jemi me këmbë në tokë. Loja fitohet në fushë, jo duke bërë parashikime për ndeshjen ndaj Erzenit. Duhet të jemi gjithë kohës me motivim maksimal. Na duhet të jemi dhe akoma më të përqendruar.
E keni parë dhe studiuar Erzenin në ndeshjen e fundit?
Po, e kemi parë Erzenin dhe mendoj që ata kanë një ekip të fortë, prandaj ne e kemi marrë shumë në konsideratë. Janë një skuadër cilësore dhe me alternativa në stol.
A mendoni që ky është momenti i Teutës?
Nëse ne duam që të realizojmë objektivat dhe të arrijmë atje ku ne duam, duhet të fitojmë edhe ndeshjet jashtë. Jo vetëm ato në shtëpi dhe mbi të gjitha edhe takimet me rivalë si Erzeni.
