Në prag të nënshkrimit të një marrëveshje mes Rishi Sunak dhe Emanuel Macron për të ridimesionuar skemën e bllokimit të kalimit të emigrantëve në kanalin e “La Manshit”, në brigjet e veriut të Francës është regjistruar një përleshje e dhunshme e emigrantëve që synojnë të shkojnë me gomone në Britani dhe policisë franceze.
Emigrantët kanë goditur me gurë policinë franceze në një gjendje rebelimi dhe zemërimi pasi oficerët prenë dhe shfrynë gomonet që po përgatiteshin për kalimin e Kanalit anglez këtë mëngjes.
Grupi u përlesh me policinë në fshatin Gravelines pranë Dunkirkut pasi qindra emigrantë u nisën drejt zonës të premten.
Sipas GB News, oficerët publikë nga CRS franceze (rezerva e përgjithshme e Policisë Kombëtare Franceze) prenë dhe shfrynë të paktën dy nga gomonet e emigrantëve para se ata të dilnin në det.
Të frustruar, emigrantët filluan të gjuanin gurë dhe degë pemësh mbi oficerët, të cilët përdorën spërkatjet me spray për të kontrolluar trazirat.
Përplasja është rezultat i një pranie të re policore në të gjithë bregun francez midis Dunkirk dhe Calais, përpara një njoftimi të pritshëm për një marrëveshje të re të sigurisë.
Mbretëria e Bashkuar ka rënë dakord të paguajë 60 milionë paund shtesë për të ndihmuar autoritetet të forcojnë praninë e sigurisë përgjatë bregdetit francez.
Një numër i madh varkash të vogla pritej të niseshin këtë fundjavë pasi moti i keq ndaloi të gjitha kalimet në Kanal që nga 31 tetori.
Aktualisht ka rreth 6,000 kampe të improvizuara në zonën e Dunkirk, me shumicën e emigrantëve në zonë që janë të rinj, megjithëse ka dhe gra me fëmijë.
Grupet e para që mbërritën në Britani pas përmirësimit të motit u fotografuan në orët e para të së shtunës në varkat e Forcave Kufitare në Dover, Kent, për herë të parë në dy javë.
Familje dhe gra me fëmijë të vegjël ishin mes atyre të fotografuar duke zbritur nga anijet e Forcave Kufitare, pasi u morën nga Kanali.
Kjo valë e re vjen pasi Sekretarja e Brendshme Suella Braverman është nën presion për t’i dhënë fund krizës.
Ndërkohë, është zbuluar se Home Office ka deportuar 350 persona në tetor, më shumë se 100 prej të cilëve shtetas shqiptarë. Aty përfshiheshin edhe 22 persona që mbërritën pasi kaluan Kanalin me gomone dhe u larguan direkt nga qendra e përpunimit Manston në Kent.
