Çështja e një shqiptari, të cilit i është dhënë e drejta nga gjykata për ruajtjen e anonimitetit pasi ka kërkuar azil në Mbretërinë e Bashkuar, nën argumentin se mbron sigurinë e tij, ka shkaktuar reagime të forta në mediat vendase.
Ishte TheSun që publikoi lajmin, pasi një gjykatës vendosi të ndalojë median në fjalë që të identifikonte shqiptarin, për të cilin nënvizohet në një artikull se është një gangster, fajtor për krime të tmerrshme, përfshirë edhe vrasje.
Aty gjithashtu bëhet me dije se “i forti” nga Shqipëria mbërriti me gomone në Britani pasi mbi të rëndonte një dënim i përjetshëm për vrasje dhe kishte kryer vepra të tjera “shumë të rënda” në vendlindje.
Por një gjykatës vendosi se identiteti i tij duhet të mbahej i fshehtë “për hir të sigurisë së tij”, pasi ai pretendoi se ishte në rrezik nga grupet mafioze rivale.
I shqetësuar mbi vendimin e gjykatës, deputeti konservator David Morris tha: “Është një vendim brutal që tregon përbuzje për qytetarët britanikë”.
“Pse të mbrohet ‘siguria’ e një krimineli karriere, i cili është dënuar për vrasje dhe nuk ka të drejtë të jetë këtu?”, pyeti ai.
Deputeti tjetër i konservatorëve, Philip Davies tha: “Publikimi i identitetit dhe krimeve të tij është qartësisht në interesin publik.”
Sakaq, gjykatësi Nicholas Aldridge, i ulur në një qendër dëgjimore të Tribunalit, vendosi që asgjë nuk duhet të publikohet që mund të identifikojë “drejtpërdrejt ose tërthorazi” gangsterin shqiptar, përfshirë këtu edhe listën e tij të krimeve.
“Është një shembull tjetër tronditës se pse ne duhet të ndalojmë gomonet”, tha një zëdhënës i Ministrisë së Brendshme për TheSun.
Sakaq, media ne fjalë ka nisur një apel kundër vendimit të anonimitetit, ndërsa gjykatësi e refuzoi kërkesën e shqiptarit për lirim me kusht.
Burri, i cili u shfaq përmes lidhjes me Skype, mbetet në paraburgim në një qendër imigracioni dhe së shpejti pritet një vendim nëse ai do të dëbohet nga Britania ose jo.
