Përplasjen me ministren e Brendshme britanike Suella Braverman duket se nuk do ta hedhë lehtë pas krahëve kryeministri Edi Rama, i cili në disa intervista dhe dalje publike kërkoi ndaljen e retorikës kriminale dhe demonizuese ndaj shqiptarëve.
Duke mos mbajtur përgjegjësinë për numrin e lartë të azilkërkuesve dhe faturimin e saj te autoritetet britanike që sipas tij kanë dështuar në politikat e tyre të emigracionit, Rama u përpoq ta shiste ngritjen e toneve nga Braverman për shqiptarët, si justifikim për të mbuluar problemet e brendshme në Londër.
Por, Rama ka shkuar edhe më tej teksa sot në një prononcim për SkyNews lidhur me çështjen e kalimeve me gomone në Kanal, ka kërkuar që Sekretarja britanike t’i kërkojë falje publike, pasi i përshkroi emigrantët shqiptarë si “pushtues” të Britanisë.
“Nuk kam dëgjuar kurrë një falje, gjë që më bën të mendoj se në vend të shprehjes së ekzagjeruar të zhgënjimit, ky ishte një sulm i llogaritur”, tha Rama për SkyNews.
“Dhe kjo është gjëja më shqetësuese. Kur kërkon falje, është në rregull – ndodhi. Kur nuk e bën, dhe kur e shmang, atëherë do të thotë se dëshiron diçka nga ajo që thuhet. Pra, do të thotë se ka një llogaritje pas saj, do të thotë që vërtet po flet me një numër të caktuar votuesish që duan të dëgjojnë këtë. Dhe ju po i ushqeni me këtë sepse keni nevojë për votat e tyre. Por pasojat e kësaj mund të jenë shkatërruese për njerëzit, për njerëzit tanë në Britani dhe për vetë Britaninë”, shtoi më tej kryeministri.
Ndër të tjera, Rama i komunikoi gazetarit edhe idenë e tij për ngritjen e një force speciale të përbashkët me Mbretërinë e Bashkuar për të ndihmuar autoritetet në Londër për shënjestrimin e trafikantëve.