Nga Boldnews.al
Kushdo që mendon se në Tiranë ka një mori pallatet me kate e shtesa pa leje, e ka gabim. Të paktën këtë synon qeveria që të bindë qytetarët.
Aksioni për paligjshmërinë e ndërtimeve, i cili nisi në Shtator të këtij viti ka stopuar në kryeqytet dhe po vijon në qytete të tjera.
Kjo kuptohet nga vendimmarrja e djeshme e Këshillit të Rregullimit të Territorit (KRRT), një strukturë në varësi të kryeministrit Edi Rama.
KRRT kishte në rend dite në mbledhjen e së Enjtes (9 nëntor 2022), konfiskimin e 8 objekteve pa leje apo me shtesa katesh.
Në këtë listë konfiskimesh, më në fund, u përfshi edhe godina e ndërtuar nga kompania “Salillari”, në zonën e Farkës, në Tiranë.
Pallati me kate pa leje i Pëllumb Salillarit u raportua për herë të parë nga kreu i Ministrisë së Brendshme, Bledi Çuçi, në mes të muajit Shtator.
Por, Këshilli i Rregullimit të Territorit nuk e pa të arsyeshme për ta konfiskuar në mbledhjen që zhvilloi në 19 Tetor, ndoshta në përpjekje për t’u harruar nga opinioni publik.
Gjithësesi, presioni mediatik duket se e vendosi para presionit dhe godina e Salillarit u përfshi në listën e dytë të konfiskimeve.
Së bashku me këtë pallat, KRRT vendosi konfiskimin për shkak të shkeljes së lejeve të ndërtimit apo për ndërtim pa leje edhe 7 objekte të tjera.
Më poshtë është lista e plotë:
- Godinë banimi dhe shërbimi 2, 4 dhe 6 kat, me 2-5 kat parkim dhe shërbime nëntokë, me vendndodhje pranë Liqenit të Thatë (Kopshtit Zoologjik), Selitë, Bashkia Tiranë, me zhvillues shoqërinë “Salillari” sh.p.k.
Kompania ndërtuese është në pronësi të biznesmenit Pëllumb Salillari
- Kompleks banimi dhe shërbimesh 1 – 2 kat, me 1 kat parkim nëntokë dhe me mur rrethues, me vendndodhje në Selitë, Bashkia Tiranë, me zhvillues me zhvillues shoqërinë “Aleksandros” sh.p.k.
Kompania ndërtuese është në pronësi të Arben Isufi, me seli në Përmet.
- Zgjerim papafingo dhe ballkone në hotel, me vendndodhje në Golem, Bashkia Kavajë, me zhvillues Genci Hoxha dhe Anila Hoxha.
- Rikonstruksion i papafingos pa ndryshim sipërfaqe, me vendndodhje në Golem, Bashkia Kavajë, me zhvillues shoqërinë “Dervishi – 2019” sh.p.k.
Kompania është në pronësi të Arben Dervishi, me seli në Kavajë.
- Hotel 5 kat, me papafingo dhe 1 kat podrum”, me vendndodhje në Malin e Robit, Bashkia Kavajë, me zhvillues shoqërinë “Vinari” sh.p.k.
Kompania është në pronësi të Fatmir dhe Rifat Biturku, me seli në Golem, Kavajë.
- Godinë banimi dhe shërbimesh 6 kat, me vendndodhje në Qerret, Bashkia Kavajë, me zhvillues shoqërinë “Vezi Group” sh.p.k.
Shoqëria ndërtuese është në pronësi të Blerim Vezit, me seli në Sallmone, Durrës.
- Objekt banimi dhe shërbimi 2-4-6-10-11 kate, me 1 kat parkim nëntokë, pranë plazhit të vjetër Vlorë (Objekti A), me vendndodhje në Bashkinë Vlorë, me zhvillues shoqërinë “Ndërtimi F.I.2009” sh.p.k
Kompania ka selinë në Vlorë dhe është në pronësi të Shkëlzen Çobo dhe Izmir Shehu.
- Objekt banimi 5 kate, me 1 kat dyqane dhe1 kat parkim nëntokë, midis shëtitores dhe qendrës së re administrative Orikum”, me vendndodhje në Bashkinë Vlorë, me zhvillues shoqërinë “Enri” sh.p.k.
Kompania është në pronësi të Arben dhe Aida Niço.
