Kryeministri Edi Rama është ndalur sërish tek debati i këtyre ditëve në Shqipëri dhe Britani, emigrimin masiv të shqiptarëve.
Kryeministri Edi Rama, gjatë një vizite në Kamëz dhe Paskuqan, ju ka bërë thirrje të rinjve që të mos harxhojnë 10 mijë paund për të ikur me gomone në Angli, por këto para t’i investojnë në tokatë e prindërve.
Rama theksoi se çdo i ri shqiptar nëse do të përkushtohej më shumë në punë, do të fitonte më shumë para se në Angli, dhe shtoi se ju referohet vetëm atyre shqiptarëve që merren me punë të ndershme, dhe jo atyre të krimit.
“Investojini paratë që harxhoni për në Angli tek toka e babës dhe gjyshit, dhe ju siguroj që do të fitoni më shumë se sa atje, flas gjithmonë për ata që bëjnë punë të ndershme, jo për ata që i futen krimit.
Emigrimi nuk është trend të në gjithë Evropën. Këto trende s’po vijnë si pasojë e politikës së degjeneruar, pasi asnjë lloj skuadre politike, pasi ju e dini se unë nuk kam asnjë respekt për ata që ishin para nesh, por asnjë skuadër politike s’do të kishte mundur dot, e ardhur dhe nga hëna, që të mbyllte derën dhe t’i mbante shqiptarët këtu që të gjithë. Kjo do të thotë që këtu në një periudhë kohe të shkurtër, për një periudhë të tillë nuk është e gjatë, që të bëhej si Gjermania, apo Zvicra. Kjo nuk është e mundur. Po të ishte e mundur do kishte ndodhur diku tjetër. Po të ishte se këtu do ta kishin të gjithë fajin ‘politikanët e poshtër’, atëherë me siguri në vendet e tjera do kishin dalë politikanë apo udhëheqës që s’do ta kishin lejuar një lloj trendi. Por kjo s’ka ndodhur.
Më tregoni një vend sot, jo nga ata që janë në nivelin tonë, por në Europën e Bashkuar, ku të rinjtë nuk ikin nga fshati. Kjo është gjëja më normale. Diku më shumë e diku më pak. Më tregoni një vend pas vitit 90 që s’ka pasur largime masive. Mos të harrojmë që vendet e tjera nuk dolën nga izolimi total si ne. Vendet ish-komuniste nuk e kishin të hapur rrugën për të shkuar lirisht në Perëndim, por kishin të hapur rrugën mes veti. Pa llogaritur vendet e ish-Jugosllavisë, dhe iknin kudo. Largimet i kanë bërë me kohë dhe vakt. Ne u mbyllëm 50 vite brenda, na u hodh çelësi në det. Shqiptarët kanë emigruar gjithmonë. Qe mos të kishin emigruar shqiptarët, s’do kishim qenë gjallë deri më sot.”, tha Rama.
