Kanë marrë fund pikëpyetjet e shumta mbi mundësinë e rikthimit të Manuel Nojerit në krye të katërkëndëshit bavarez, njëkohësisht edhe te përfaqësuesja e “Pancerave” në Botërorin e Katarit.
Edhe pse 36-vjeçari pësoi 2 gola në suksesin 2-3 ndaj Hertës, sërish ai realizoi paraqitje dinjitoze, marrë në konsideratë mungesën për shkak dëmtimi në shpatull: “Nuk e prisja që takimi në ‘Olympoistadion Berlin’ të ishte aq i zjarrtë, aq sa na detyroi të pranonim edhe dy gola, gjithsesi ky diskutim i përket së shkuarës. E rëndësishme është që shpatulla nuk më krijoi probleme, edhe pse dhimbjet ishin ende prezente. Asgjë shqetësues, thjesht më nevojitet ende kohë për t’u riaftësuar plotësisht. Më e madhja kaloi, tashmë të fokusohem në duelet e mbetura me klubin dhe të zhvilloj paraqitje sa më të mirë, me qëllim për të qenë plotësisht gati në Katar”, nënvizonte mes buzëqeshjes kapiteni i kampionëve në fuqi të Bundesligës.
Manuel pati guximin të fliste edhe mbi sëmundjen e kancerit të lëkurës: “Pas të 30-ave gjendja bëhet shqetësuese mbi kancerin e lëkurës, askush nuk duhet të tregohet neglizhues, pasi asgjë nuk kalon nëse nuk zgjidh kurën e duhur. Më duhet të shkoj çdo 6 muaj te dermatologu në lidhje me shëndetin tim mbi këtë element, e rëndësishme është se jam mirë”, përfundoi gardiani gjerman.
