Të rinjtë që studiojnë në universitetin ‘Ismail Qemali’ në Vlorë kanë komentuar deklaratën e kryeministrit Edi Rama, i cili është shprehur se të rinjtë mund të ikin nga Shqipëria nëse duan. Në një prononcim për Euroneës, ata shprehen se e shohin veten në një të ardhme me një punë që u shpërblen mundin. Një prej tyre thotë se planifikon të ndërtojë familje në një vend që ndihet e sigurtë dhe vlerësohet. Të paktë janë ata studentë të cilët mendojnë se kontributin e tyre do ta japin në Shqipëri.
Prononcimet:
Studenti 1: Pavarësisht se Shqipëria duke qenë se të gjithë e dimë që të ardhurat janë minimale dhe normal që çdo njeri do sa më mirë dhe çdo kush do të iki jashtë sepse në Shqipëri është shumë pak.
Studenti 2: E shoh veten jashtë në një punë më të mirë në një vend që më siguron të ardhura më të mira, në një vend që vërtet të ndjehem e sigurt, dhe jo këtu ku dijet e mia nuk do të vlerësohen ashtu siç duhet sepse ne mundohemi çdo të ditë, por kur nuk vlerësohemi!
Studenti 3: Pas studimeve do të bëj disa specializimi jashtë shtetit dhe pse jo një përvojë disavjeçare andej dhe pastaj do të bëj një kthim në Shqipëri për t’i ardhur në ndihmë atdheut tim. Për mendimin tim kryeministri duhet ta ketë parë në këtë sferë që unë thashë pak më parë largimin e të rinjve, që ai e ka thënë që të rinjtë duhet të japin një herë kontributin e tyre këtu pastaj të largohen.
Studenti 4: Nuk e kam parë, por mendimi im është që nuk duhet të largohen, të vazhdojnë studimet këtu dhe të ushtrohen sa më shumë këtu.
Vetëm dy ditë më parë, Kryeministri tha se Shqipëria nuk është në komunizëm dhe kush të dojë mund të largohet.
“Një gazetare britanike kishte shkruar një artikull ku thoshte se vetëm vendet diktatoriale vënë në diskutim lirinë e njerëzve për të ikur apo për të ardhur. Shqiptarët sot po bëjnë atë që bota e ka bërë qysh në lindje të saj. Atë që ne kur kemi qenë më pak të pasur se sot e kemi bërë shumë më tepër se këta në një kohë tjetër. E solla këtu për të thënë që është e pamundur, që t’u thuhet njerëzve rrini këtu, mos ikni, se këtu është atdheu. Njerëzit janë në të drejtën e tyre të marrin vendimet e tyre. Shyqyr zotit nuk jemi në bunkerin e komunizmit,”- tha Rama.
