Në Pejë të Kosovës, ditë më parë, në një qendër private për përkujdes ndaj të moshuarve ndodhi një ngjarje e cila tronditi vendin. Infermieret ,të cilat u panë në një video teksa godisnin një të moshuar të qendrës, tashmë janë në paraburgim. Por edhe qendra që ofronte shërbime për të moshuarit nga e hëna është e detyruar të mbyllet, pas revokimit të licencës së saj.
Këtë vendim e kundërshtoi pronari i qendrës por edhe disa të moshuar, të cilët nuk kanë nga të shkojnë. Kjo qendër e të moshuarve në Pejë nga e cila ditë më parë doli një video ku shiheshin disa infermiere teksa ushtronin dhunë mbi një banore të qendrës, të hënën është e detyruar të mbyllë dyert. Mbyllja e saj vjen pas revokimit të licencës që lëshoi Ministria e Financave.
Këtë vendim, pronari i qendrës “Orenda”, z. Anton Rasaj e cilëson arbitrar. Ai përmes një konference për media thotë se ka qenë i detyruar që të njoftojë të afërmit e banorëve në këtë qendër, që të vijnë dhe t’i tërheqin ata.
Këtë vedim po e kundërshtojnë edhe disa banorë të qendrës dhe familjarë të tyre, sipas të cilëve nuk kanë mundësi që kaq shpejt të tërhiqen nga Qendra.
Pronari i qendrës thotë se do të padisë institucionet e Kosovës në Gjykatën e Arbitrazhit për investitorët e huaj, ndërsa çështjen e betejës ligjore, tha ai, do t’ua besojë avokatëve vendorë dhe atyre zviceranë./RTK
