Manchester City ka marrë një fitore dramatike 2-1 kundër Fulham pasi kishte mbetur me dhjetë lojtarë që në minutën e 26-të të ndeshjes së luajtur në Etihad.
Gjithçka ka filluar mirë për skuadrën e Pep Guardiola-s, që ka kaluar në avantazh pas vetëm 16 minutash lojë me një gol të bukur të Julian Alvarez.
Situata ka ndryshuar në minutën e 26-të për Qytetarët, pasi Joao Cancelo është ndëshkuar me karton të kuq për një faull brenda zonës së rreptësisë duke i dhuruar një lojtar më shumë dhe një penallti Fulham-it. Te pika e bardhë është paraqitur Pereira, i cili nuk ka gabuar.
Në minutën e 64-t është futur në fushë Erling Haaland, i cili e kishte nisur ndeshjen nga stoli për shkak të disa problemeve fizike që ka pasur në ditët e kaluara.
Sulmuesi norvegjez i kanë mjaftuar 11 minuta për të gjetur golin dhe për të kaluar në avantazh City-n, por goli është anuluar pas ndërhyrjes së VAR për një pozicion jashtë loje.
Kur dukej se ndeshja do të mbyllej barazim, Manchester City ka gjetur golin e fitores me një penallti të Erling Haaland në minutën e pestë të kohës shtesë.
Një fitore kjo që i jep mundësinë Qytetarëve të marrin përkohësisht kreun e Premier League duke parakaluar Arsenal-in, që do të luajë nesër kundër Chelsea-t.
