Kreu i shoqatës së biznesit Albert Nasto foli sot në studion e “Fax News” për kërkesat që ata kanë ndaj qeverisë dhe si do planifikohen protestat në rast se nuk ka një zgjidhje konkrete për situatën e rënduar ekonomike.
Sipas Nastos ekonomia shqiptare ka rrëshqitur dhe janë 2 çështje kryesore që duhen rregulluar ose përndryshe mijëra biznese do mbyllin çepenat. Ai tha se duhet përgjysmuar taksa mbi karburantet dhe të ulet çmimi i energjisë elektrike
“Janë 9 taksa për çdo litër karburant. Ne kemi kërkuar që herët qeverisë shqiptare që të përgjysmojë deri në një moment të caktuar taksat mbi naftën, të paktën deri në 50%. Me këto taksa të larta, po shkatërrohet dhe ky lloj biznesi që ka mbetur në Shqipëri. Qeveria shqiptare ndihmon më shumë oligarkinë apo monopolin, ka arkëtuar 460 milionë euro nga taksat mbi karburantin kjo qeveri, pra sot ne kemi çmimin më të lartë.
Ne protestojmë për këtë, të hiqet 60% taksë e karburantit për një vit ose më shumë, sepse vendet e rajonit po bëjnë gjithçka për të mbajtur gjallë bizneset.
5% monopole po ndihmohen dhe oligarkët me fije të padukshme me qeverinë shqiptare, ndërsa ne të tjerët po paguajmë më shtrenjt çdo produkt.
Çështja e dytë, çmimi i energjisë elektrike, 182 lekë për kilovat dhe theksoj se çdo kilovat nga hidrocentralet tona del me 99 lekë të vjetra. ERE është vënë në dispozicion të qeverisë shqiptarë, shkatërrohet gjithçka këtu.
70%e biznesit hyn në fashën 800kë/h, nëse futen në këtë fashë atëherë do mbyllen çepenat, jo vetëm një por me mijëra. Pse të rritet energjia elektrike kur në 2021 i përmbushëm të gjitha nevojat?! Ekonomia ka “rrëshqitur”, gjysma e saj është monopol”-tha Nasto.
