Ditën e enjte policia ka sekuestruar rreth 30 kg kokainë në Portin e Durrësi e porositur nga kompania “Zico Company” e njohur ndryshe si “Bana King” në pronësi të Trifon Murataj.
Gjatë njoftimit për mediat uniformat blu e “shesin” si sukses arrestimin e administratorit të kësaj kompanisë por në realitet kanë dështuar për të vendosur në pranga presidentin e “Bana King”, Trifon Muratajn. Policia bën me dije se shtetasi Trifon Murataj është shpallur në kërkim pasi kompania që ai zotëron është kapur në flagrancë ku mes kutive të bananeve janë sekuestruar pako me kokainë. Po ashtu, nuk është hera e parë që sekuestrohet drogë në kontejnerët e porositur nga “Bana King”.
Gjithashtu policia bën me dije se ka arrestuar edhe 2 punonjës të skanerit, në Portin e Durrësit të cilët dyshohet se në bashkëpunim me njëri-tjetrin, kanë lejuar trafikimin e lëndës narkotike nga Ekuadori në drejtim të Portit të Durrësit.
“Port, Durrës – Vijon operacioni policor i koduar “Again”, për goditjen e veprimtarisë kriminale në fushën e trafikimit të drogave të forta. Vihet në pranga administratori i kompanisë që priste ngarkesën me banane, brenda së cilës Policia gjeti 33.5 kilogramë kokainë.
Shpallet në kërkim presidenti i kësaj kompanie.
Në pranga edhe 2 punonjës të skanerit, në Portin e Durrësit.
Në vijim të veprimeve të thelluara hetimore, të kryera nga strukturat e Hetimit të Krimit të Drejtorisë Vendore të Policisë Durrës, për zbardhjen e rastit të trafikimit të 33.5 kilogramë lëndë të dyshuar narkotike kokainë, që u gjetën dhe u sekuestruan nga Policia, gjatë operacionit policor të koduar “Again”, u bë arrestimi në flagrancë i shtetasve:
P. D., 57 vjeç, banues në Tiranë, me detyrë administrator i kompanisë që kishte porositur ngarkesën me banane, për veprën penale “Trafikimi i lëndëve narkotike”;
A. N., 48 vjeç, banes në Tiranë, me detyrë operator skaneri, në Portin e Durrësit, për veprat penale “Trafikimi i lëndëve narkotike” dhe “Falsfikimi kompjuterik”;
A. S., 48 vjeç, banues në Tiranë, me detyrë imazhier skaneri, në Portin e Durrësit, për veprat penale “Trafikimi i lëndëve narkotike” dhe “Flasifikimi kompjuterik”.
Gjithashtu u shpall në kërkim shtetasi T. M., 53 vjeç, banues në Tranë, president i kompanisë pritëse të ngarkesës me banane.
Arrestimi i 3 shtetasve dhe shpallja në kërkim e presidentit të kompanisë, u bënë në kuadër të operacionit policor të koduar “Again”, gjatë të cilit, shërbimet e Policisë, bazuar në inteligjencën informative që dispononte Policia e Shtetit, se në një kontenier me ngarkesë bananesh, për llogari të një kompanie në Tiranë, kishte lëndë narkotike, ushtruan kontroll të imtësishëm me qen antidrogë, pavarësisht se skaneri e nxorri të pastër ngarkesën me banane.
Nga hetimet dyshohet se këta shtetas, në bashkëpunim me njëri-tjetrin, kanë organizuar trafikimin e 33.5 kg kokainë, nga Ekuadori në drejtim të Portit të Durrësit”, thuhet në njoftimin e policisë.
Materialet proceduriale në ngarkim të shtetasve të arrestuar i kanë kaluar Prokurorisë.
