Çdo ditë të rinjtë duan të largohen nga Shqipëria.
Edhe në qytetin e Elbasanit të rinjtë janë të vendosur për t’u larguar qoftë për studime apo edhe për të punuar. Sipas tyre gjetja e një vendi pune mbetet mjaft e vështirë e po ashtu pagesat mbeten të ulëta.
Në Elbasan nuk kanë asnjë shpresë për të ndërtuar të ardhmen, ndaj sytë i hedhin nga Gjermania dhe Amerika. Presin me padurim të mbyllin shkollën dhe ti drejtohen rrugëve të “botës”. Sipas tyre jetesa në Shqipëri është bërë e vështirë. Për një qytet të varfër dhe pa shumë mundësi si Elbasani krijimi i të ardhmes bëhet dhe më i vështirë.
“Mbaron universitetin s’gjen punë. S’kemi shpresa këtu, s’ka zgjidhje përveçse të largohemi”-u shpreh një i ri për mikrofonin e “Fax News”.
Jo pak i ka befasuar deklarata e Kryeministrit nga Korca . Kreu i qeverisë u shpreh se të rinjtë janë të lirë të largohen nëse duan, për të provuar emigrimin.
“Të rinjtë nuk e shohin veten pjesë të një shteti demokratik”-tha një tjetër student.
Zbrazjen e vendit dhe largimin e të rinjve e has në cdo skaj të Elbasanit. Popullsia në këtë qytet është plakur dhe fakt janë auditoret bosh dhe parqet e mbushura plot me të moshuar. Këta të fundit duket se janë të vetmit që e shohin të ardhmen këtu.
