Nga Boldnews.al
Në mungesë të theksuar argumentash, kryeministri Edi Rama ka zgjedhur të sulmojë personalisht kreun e Sindikatës së Pedagogëve, Sandër Kovaçi, i cili po drejton një prej protestave më të mëdha të grupeve të interesit në vitet e fundit.
Rama filloi nga takimet para-elektorale në Dibër, Bulqizë e më pas në Tiranë, duke e konsideruar Kovaçin si “shiks”, duke i kujtuar faktin që profesori Kovaçi më herët ka qenë pjesë e strukturave drejtuese në Shërbimin Informativ Shtetëror (SHISH).
Ky sulm, natyrisht i pamoralshëm, godet një kategori të rëndësishme të punësuarish në institucionet publike.
Sipas leksikut të Ramës, çdo punonjës i Shërbimit Informativ, nga më i larti e deri tek agjentët në terren, duhet etiketuar me terma pezhorativë, a thua se janë “armiq” të Shtetit.
Nëse do të jetë kështu, atëherë përse ekziston Shërbimi Informativ Shtetëror? Mjafton të mbledhë vartësit e tij partiakë dhe të detyrojë Parlamentin ta shkrijë si strukturë, si “një e keqe” që prish imazhin e vendit.
Por, në fakt, sulmi i Ramës ndaj Kovaçit duket qartësisht që lidhet vetëm me faktin që ai dhe pedagogët e tjerë sindikalistë nuk po ulin kokën dhe po mbajnë ngritur nivelin e kërkesave të tyre mëse normale, për rritjen e pagave, të paktën në nivelin e homologëve të tyre në rajonin e Ballkanit.
Sipas biografisë profesionale të Kovaçit, ndër të tjera, ai ka ushtruar detyrën e Drejtorit të Departamentit të Analizës në Shërbimin Informativ Shtetëror, në periudhën 2013-2015.
Në atë kohë, SHISH drejtohej nga Visho Ajazi (Lika), i cili, në përfundim të mandatit të tij, “u dekorua” nga vetë Edi Rama në postin e Ambasadorit të Shqipërisë në NATO.
Pra, Rama e vlerësoi Vishon dhe, rrjedhimisht, edhe bashkëpunëtorët e tij në SHISH, ku përfshihej edhe Sandër Kovaçi.
Por, tashmë që pedagogu është në krye të grevës së profesorëve universitarë të të gjithë Shqipërisë, Rama e quan në mënyrë ofenduese “shiks”.
“Shik-si” Kovaçi është i keq për Ramën. Por, disa “shik-sa” të tjerë janë të mirë.
Rasti më tipik është ai i Damian Gjiknurit, Sekretarit të Përgjithshëm të Partisë Socialiste, praktikisht numri 2 pas Edi Ramës në radhës e maxhorancës.
Në biografinë profesionale të Gjiknurit, të publikuar edhe në faqen zyrtare të internetit të Partisë Socialiste, shënohet se ai ka qenë “Drejtor i Planizim-Drejtimit në Shërbimin Informativ Shtetëror” në vitin 1998.
Në atë kohë, SHISH drejtohej nga Fatos Klosi, një ish-profesor i shkëlqyer matematike, që sot është shndërruar në një megafon për arritjet (imagjinare) qeveritare.
Por për Ramën, miku dhe bashkëpunëtori i tij, Gjiknuri, nuk është “shiks” në kuptimin pezhorativ.
Gjiknuri është “shiks” i mirë, pasi i bindet Ramës. Profesor Kovaçi është “shiks” i keq, pasi guxoi të cënojë pushtetin absolut të Liderit Global.
