Kryeministri Edi Rama ka folur për dështimin e bujqësisë dhe për fermerët që hedhin në rrugë prodhimin e tyre për shkak se nuk i shitet.
Gjatë takimit me simpatizantë të Partisë Socialiste nga Korça, Rama sërish sulmoi televizionet dhe mediat që pasqyrojnë problematikat e fermerëve të cilët janë harruar nga qeveria shqiptare. Sipas Ramës fshati është më i bukur, ndryshe nga çfarë del në ekranet televizive.
“Më vjen shumë mirë që jemi në Korçë se e kam përmendur shpesh shembullin e Korçës, ku janë të dyja anët e medaljes. Njëra anë e medaljes ajo e atyre që dalin në rrugë për të hedhur mollët është bërë publike përmes pasqyrave të deformuara të televizorëve që gjysmë të vërtetat që janë dhe gënjeshtrat më të mëdha i kanë bërë ushqimin e përditshëm të popullit tonë. Sepse e vërteta e plotë është tjetër. Ata fermerë që hedhin mollët nuk janë aktorë, janë njerëz realë, janë fermerë që përpiqen por që dështojnë, por kjo është njëra pjesë e të vërtetës. Pjesa tjetër janë shumë herë më tepër sesa ata që prodhojnë, grumbullojnë dhe eksportojnë mollën përveçse e shesin dhe tregun e brendshëm. Pasqyrimi i vëtëm gjysmë të vërtetës prodhon një gënjeshtër të madhe ku sipas tyre Shqipëria është e braktisur. Kjo është gënjeshtër e madhe sepse bujqësia sot është si asnjë vit e asnjë ditë më parë se deri më sot, por patjetër në raport me aty ku duam të arrijmë jemi ende në hapat e parë pas një ringritjeje”, tha Rama.
