Kryetari i Partisë Demokratike, Sali Berisha ka akuzuar kryebashkiakun e Tiranës, Erion Veliaj në lidhje me ndërtimin e impantin e ujërave të zeza.
Në emisionin “Now” në Euronews Albania, Berisha u shpreh se kishte marrë një kredi të butë nga qeveria japoneze prej 120 milionë dollarësh për ndërtimin e impiantit.
Por, ai nënvizoi se paratë janë marrë dhe vepra nuk është kryer. Përgjegjës bëri Veliajn.
“Erion Veliaj ka vendosur standardin e mashtrimit, ryshfetit dhe të gjitha më të këqijat. Edhe me ujin, vuri sistemin e boteve. Bashkia organizonte botet e ujit vetëm duke vjedhur. Erion Veliaj përbën modelin më të keq të një qeveritari që ka ekzistuar ndonjëherë. Nuk them të lehtë, por të mundshëm plotësisht. Është një vepër tjetër e ujërave të zeza. Unë kam marrë kredinë e butë nga qeveria japoneze gjatë vizitës sime aty. 120 milionë dollarë vetëm për ujërat e zeza të Tiranës. Ku është vepra, pyesni Erion Veliajn. Impianti i ujërave të zeza të Tiranës, e groposi Erion Veliaj”, theksoi kryedemokrati.
Një tjetër akuzë lëshoi ndaj Veliajt, kur tha se ai ka krijuar 1200 shoqata për të blerë votat. Por, shtoi se pavarësisht kësaj, nuk mund t’i fitojë zgjedhjet lokale të vitit 2023.
“Erion Veliaj ka krijuar 1200 shoqata të regjistruar në Gjykata për të blerë vota. Veliaj nuk mund t’i marrë zgjedhjet. Ne po e ndjekim. Unë zgjedhjet nuk i bojkotojë por Veliaj nuk hyn në bashki nëse dhunon zgjedhjet”, deklaroi ai.
