Dita e sotme shënon nisjen e javës së tretë të bojkotit të auditorëve nga ana e pedagogëve, të cilët kanë zgjedhur këtë formë proteste ndaj qeverisë, në mungesë të reagimit për kërkesën e tyre për rritje të pagave nga ana e kryeministrit Edi Rama dhe ministres së Arsimit, Evis Kushi.
Ashtu siç ka ndodhur në çdo fillim jave, ora 11:00 shënoi edhe sot nisjen e protestës së radhës kombëtare nga ana e pedagogëve, të cilët zhvilluan tubimin përballë Universitetit Politeknik të Tiranës.
E teksa ecuria e vitit akademik mbetet në rrezik dhe kërkesat po bien në vesh të shurdhët, Sindikata e Pedagogëve ka njoftuar sot se do të përshkallëzojë protestën, duke u futur në grevë urie.
Kreu i sindikatës së pedagogëve, Sandër Kovaçi njoftoi se qeveria do të ketë kohë të reflektojë mbi qëndrimin e saj deri të mërkurën në orën 16:00 të datës 2 nëntor, në të kundërt pedagogët do të nisin grevën e urisë pa afat.
“Lëvizja jonë universitare, lëvizje e pastër intelektuale e shpirtit të lirë. Nuk është e sponsorizuar as nga rublat ruse, lirat turke apo paratë e pista të oligarkisë shqiptare. Në këtë betejë e kemi filluar prej tre vitesh, por të specifikuar prej dy muajsh këtë peticion shoqëruar me 6 javë protesta. Deri tani qeveria ka treguar që s’ka vesh për të dëgjuar kërkesat tona. Ajo ofron vetëm zgjidhje kozmetike dhe ato në trajtë printimesh dhe ofron intimidime që të heqim dorë. Në këto kushte pas një diskutimi me stafet është propozuar të kalohet protestë në trajtën e grevës së urisë. Dhe në këtë fazë mund të bëjë efekt. I kërkojmë një po të madhe në këtë akt. Deri të mërkurën i lëmë kohë për zgjidhjen e kërkesave tona. Të mërkurën në orën 16:00 të jemi këtu përpara universitetit politeknik për grevë”, deklaroi Kovaçi.
Kovaçi e kishte paralajmëruar nisjen e grevës së urisë edhe tre ditë më parë, me vetë Kovaçin që foli për mediat gjatë bojkotit që u zhvillua përballë kampusit universitar.
Ai u shpreh se përodimi i variantit të fundit do të realizohej pasi deri më tani nuk ka pasur asnjë reagim nga qeveria dhe ministria ndaj kërkesave të tyre.
“Duke qenë se në këto kushte kur nuk ka pasur reagim deri tani, erdhëm në fazën e një bojkoti të deritanishëm, dhe tani i kemi dërguar kërkesë qeverisë të krijojë urën e komunikimit. Nuk duam të përdorim variantin e fundit, atë të grevës, por mund të përdoret për të ushtruar presionin e duhur mbi autoritetet për të reaguar në mënyrë konstruktive dhe ta kuptojnë rëndësinë e këtij bojkoti”, u shpreh Kovaçi.
Sakaq, Sindikata e Pedagogëve dhe Sindikata e Punonjësve të Universiteteve bojkoton prej 17 tetorit auditorët, teksa kërkojnë nga ministria e Arsimit dhe qeveria rritjen me 30% të pagave këtë vit dhe 20% vitin që vjen ndërkohë që kërkojnë më shumë financime sa i përket kërkimeve shkencore.
Në krahun tjetër, kryeministri u është përgjigjur protestave të tyre, duke ofruar një rritje me 15% të pagave ku 8 % do mbulohet nga shteti dhe 7% nga universitetet, por kjo u refuzua nga pedagogët.
Rama në ditët e fundit gjithashtu duket se e humbi toruan me pedagogët, duke i sulmuar dhe hedhur baltë mbi ta, teksa kreun e Sindikatës e cilësoi si një ish-anëtar të SHIK-ut.
