Tirana është tronditur mbrëmjen e djeshme nga një vrasje me kallashnikov e ndodhur pak pas orës 23:00.
Sanaj, edhe pse një personazh i paskeduar më parë nga policia, mësohet se përdorte disa identitete. Rojet e rezidencës ku ai banonte prej rreth një viti e dinin se quhej Anton Gjini, ndërsa fqinjët e thërrisnin “Skerdi“. Sa i përket emrit të tij të vërtetë në certifikatën e lindjes rezulton të jetë Skerdilaid Sanaj.
Në vitin 2015 vëllai i Sanajt kishte plagosur një person në Ishull-Lezhë dhe pista ta kryesore ku po heton policia është hakmarrja
Dhjetëra persona janë shoqëruar në polici mbrëmjen e djeshme me qëllim zbardhjen e vrasjes së Sanaj. 39-vjeçari, baba i dy fëmijëve prej vitesh ka jetuar në Itali, për t’u kthyer vetëm dy vite më parë, ku prej më shumë se një viti jetonte në zonën e “Kodrës së Diellit”.
Sipas të dhënave, grupi hetimor shpresat për zbardhjen e ngjarjes i ka tek kamerat e sigurisë. Zona ku ka ndodhur ngjarja ka dhjetëra kamera sigurie. Ato janë sekuestruar të gjitha, me qëllim zbardhjen apo identifikimin e ndonjërit prej autorëve.
Disa orë pas vrasjes, një automjet u gjet nga policia në Qafë Kashar. Sipas policisë, bëhet fjalë për automjetin që u përdor nga ekzekutorët e 39-vjeçarit.
Burime nga grupi hetimor bëjnë me dije se në automjetin e djegur janë gjendur shumë pak prova, ku sipas burimeve targa e mjetit benz AA777GY, rezulton e vjedhur, ç’ka shton dyshimet për një atentat të organizuar.
Autorët janë kujdesur të mos lënë prova as në vend ngjarje. Sanaj, është qëlluar tre herë nga një distancë e afërt ku autorët kanë hapur pak xhamin e pasëm të mjetit e më pas kanë qëlluar tre herë të riun, dy prej plumbave e kanë kapur në fytyrë.
Më pas, autorët janë larguar me shpejtësi dhe kundravajtje, madje duke thyer edhe traun e sigurisë që është vendosur sa futesh në zonë.
Sakaq, një person i ndodhur rastësisht në zonë ka tentuar që t’i shpëtojë jetën Sanajt dhe e ka dërguar në spital, por fatkeqësisht i riu ka mbërritur pa jetë në dyert e spitalit.
Në vendngjarje policia ka gjetur deri më tani vetëm një gëzhojë, ndërsa dy të tjerat dyshohet se kanë rënë në automjetin e djegur.
Njoftimi i policisë:
Më datë 30.10.2022, te Kodra e Diellit, në rrethana ende të paqarta, është qëlluar me armë zjarri shtetasi B. S., rreth 39 vjeç, i cili ka ndërruar jetë rrugës për në spital.
Shërbimet e Policisë kanë shkuar menjëherë në vendngjarje, kanë ngritur pika kontrolli dhe vijojnë krehjen e zonës për identifikimin dhe kapjen e autorit/ëve.
Janë shoqëruar disa persona në Polici.
Në Qafë Kashar, në afërsi të një biznesi pllakash, është gjetur duke u djegur, një automjet.
Grupi hetimor po punon për sqarimin e plotë të rrethanave të ngjarjes dhe për fiksimin e çdo prove të vlefshme që mund të çojë në identifikimin e autorëve.
