Gjykata e Lartë ka refuzuar lirimin nga burgu për ish shefin e policisë Lezhë, Leonard Palushi, i cili u arrestua në maj të këtij viti, pasi bënte “lojë të dyfishtë” duke shitur informacion te grupet kriminale si dhe duke dekonspiruar kështu aksionet e nisura nga policia dhe prokuroria.
Gjykata e Lartë e regjistroi më 7 tetor rekursin e Palushit dhe sot, tre javë më vonë u zhvillua seanca. Trupa gjykuese nuk e konsideroi të arsyeshme pranimin e kërkesës së ish-shefit të policisë për një masë më të butë sigurie.
Palushi u vu në pranga pas dëshmisë së dëshmitarit të drejtësisë Nuredin Dumani. Ai dyshohet se ka bashkëpunuar me grupet kriminale në Elbasan.
Sipas dëshmisë së Dumanit, Erjon Alibej, i dyshuar si organizator dhe porositës i vrasjeve të Emiljano Ramazanit dhe Regis Runajt, kishte përdorur njohjet me efektivin e policisë për të devijuar hetimet për vrasjen e Emiljano Ramazanit në Elbasan, ngjarje e ndodhur në gusht të vitit 2020. Më konkretisht, Dumani tha se Plaushi ishte personi që futi armën me të cilën u vra Ramazani në një servis të familjes Manahasa. Vetë Palushi ka mohuar akuzat.
