Pavarësisht se Bashkimi Europian i dhuron Shqipërisë 80 milionë euro ndihma për përballimin e krizës së energjisë elektrike, për kryeministrin Edi Rama kjo është e pa mjaftueshme.
Në krah të presidentes së Komisionit Europian Ursula von der Leyen , Rama paralajmëron shqiptarët se nuk “shpëtojnë” dot nga vendosja e fashës së energjisë elektrike duke rritur automatikisht çmimin nga e cila do të preken mbi 71 mijë familje.
I pyetur nga gazetarët nëse kjo ndihmë nga BE, do të bëjë që qeveria të heqë dorë nga vendosja e fashës 800 kWh, kreu i qeverisë tha se në fakt është vetëm një e gjashta e të ardhurave që duhen për të mbuluar kostot e energjisë.
Rama tha se lajmi i keq për muajin nëntor është që nuk ka reshje shiu, ndërsa ditën e sotme Enti Rregullator i energjisë ka lënë në fuqi vendimin për shtrenjtimin e energjisë elektrike për periudhën 1 nëntor deri në 31 dhjetor.
“80 milionë euro grante nuk janë pak, janë një shifër e konsiderueshme. Ne kemi shtyrë aplikimin e fashës për muajin tetor, jo sepse kështu deshëm ne, por se patëm reshje dhe pamë një ulje të konsumit. Aktualisht po e shohim, reshje s’ka, qielli shkëlqen nga dielli. Lajmi është i keq. Shohim pozitivitet sa i përket kursimit. Nëse do të kursehet arsyeshëm, mundësia që ne të veprojmë ndryshe me fashën krijohet. Fasha ka kohë që është vendosur në Kosovë dhe nuk na rezulton që ka prekur gjithë popullin e Kosovës” tha ndër të tjera kryeministri Edi Rama.
Duke nisur nga java e ardhshme mbi 71 mijë familje që tejkalojnë “fashën prej 800 kWh” në muaj do ta paguajnë energjinë me 42 lekë kilovatorin nga 9.5 që është aktualisht.
