Kriza energjetike që ka kapluar Evropën dhe po rrit varfërinë frikshëm në vendet e Ballkanit Perëndimor, duket se ka “zgjuar” Bashkimin Evropian që ka përgatitur një paketë ndihmash jo vetëm për 27 vendet anëtare, por edhe për shtetet aspirante për t’iu bashkua bllokut.
Lajmin e mirë për paketën e ndihmës e ka dhënë nga Tiranë, në një konferencë të përbashkët për mediat me kryeministrin Edi Rama, presidentja e Komisionit Europian, Ursula von der Leyen.
Ajo tha se nga BE do të lançohen 500 milionë euro grante në total për Ballkanin Perëndimor, ndërsa 80 milion prej tyre do të akordohen vetëm për Shqipërinë për të përballuar krizën energjetike.
Këto fonde do të vijnë në drejtim të Shqipërisë, në formën e granteve, sipas shefes së KE-së.
“Rusia po shkel rendin ndërkombëtar dhe të drejtën ndërkombëtare. Fatmirësisht Shqipëria nuk ka fare varësi nga gazi rus, kjo për shkak të varësisë suaj nga sistemi hidrik. Por ndikimi vjen dhe në Shqipëri. Ne në BE kemi vendosur që e vetmja përgjigje që mund të japim është nëpërmjet unitetit dhe solidaritetit. Ne po propozojmë një paketë mbështetëse për Ballkanin Perëndimor. Mbështetje të drejtpërdrejtë buxhetore për të ndihmuar në zbutjen e çmimeve. Do të jenë 80 milionë euro në grante. Ju keni një sistem për të ndihmuar familjet, por edhe bizneset e vogla. Pjesa e dytë ka të bëjë jo me mbështetjen e menjëhershme, por që do të vijë pas janarit, për energjinë, 500 mln euro në grante për të investuar në infrastrukturën energjetike për të gjithë Ballkanin Perëndimor”, tha von der Leyen.
