Financimet ruse në Partinë Demokratike përbëjnë një temë që krijon përherë debat midis mazhorancës dhe opozitës, por edhe temë që kryetari i selisë blu Sali Berisha kërkon që ta sqarojë deri në detaje për të pastruar forcën politike që ai drejton nga akuzat.
Teksa e ka bërë të qartë se PD nuk ka përftuar si institucion “rubla ruse”, por ato kanë shkuar në llogaritë e ish-kryetarit Lulzim Basha, Berisha ka kërkuar sot që parardhësi i tij në detyrë të dalë e të sqarojë pozicionin e tij në lidhje me çështjen.
Sipas ish-kryeministrit, nëse Basha ka frikë nga burgu, atëherë e mira është që i të marrë statusin e të penduarit të drejtësisë.
“Basha duhet të sqarojë me çdo kusht problemin e financimit rus, ai është një kusht. Ka deklaruar se nuk është e vërtetë, por është e papranueshme nëse nuk thotë ku i ka marrë 625 mijë dollarë dhe si i ka kaluar në Skoci. Nëse ka frikë të futet në burg të kërkojë statusin e të penduarit dhe të flasë”, tha Berisha.
Ish-kryeministri shtoi se është informuar se Basha është kthyer 3 herë nga rruga për në Amerikë pikërisht për çështjen ‘Muzin’, pasi ka një dosje të hapur.
“Ato që unë kam deklaruar janë të njohura. Basha ka pasur një problem në SHBA, e sigurt, por që mund ta ketë zgjidhur. Ky është një problem tjetër. Di që jo një, por 3 herë është kthyer nga rruga për në SHBA pasi i kanë thënë që ke dosjen ‘Muzin’. Dhe pastaj është akuzuar zyrtarisht nga inteligjenca e SHBA dhe një zëdhënës i SHBA se PD ka marrë financime ruse”, deklaroi kreu i PD.
