Kreu i Prokurorisë së Përgjithshme Adriatik llalla, ka mbërritur me urgjencë paraditen e sotme në Prokurorinë e Vlorës.
Kjo lëvizje e kryeprokurorit vjen pas sekuestrimit të një sasie të madhe kanabisi në Babicë të Vlorës, e cila dyshohet se i takon bandës së Habilajve. Llalla është pritur nga prokurori Ramadan Troci Në këtë takim, kryeprokurori Llalla shoqërohet nga drejtues të Prokurorisë së Krimeve të Rënda.
Në një prononcim të shkurtër për gazetarët pas takimit, Llalla tha: “Prokuroria prej disa muajsh kishte në hetim rastin konkret. Bashkë me partnerët tanë ndërkombëtarë u finalizua me rezultate konkrete. Në vijim do të kemi të dhëna më të sakta”. I pyetur nëse do ketë arrestime, Llalla tha se kjo do të jetë në varësi të hetimeve.
Kreu i Prokurorisë së Përgjithshme do t’i drejtohet edhe Prokurorisë së Lushnjës.
