Personi që shihni në foto është 35-vjeçari Besmir Uka, i cili mbeti i plagosur si pasojë e goditjeve me thikë që mori në bark, pas një sherri të ndodhur në mesnatë në qytetin e Sarandës.
Uka mësohet se ka shkuar në spital në mesnatë i plagosur dhe i është nënshtruar një ndërhyrje kirurgjikale.
Pavarësisht plagëve të marra ai e ka drejtuar vetë automjetin deri në derën e spitalit, teksa shoqërohej nga një vajzë. Sipas të dhënave nga vendngjarja, rezulton se sherri ka ndodhur në një lokal në lagjen Nr.3.
Ndërkohë, sa i përket Besmir Ukës ai është një persona i skeduar më parë nga autoritetet, pasi ka qenë i dënuar më parë për “vrasje në kushtet e vetëmbrojtjes”.
Ngjarja në fjalë ka ndodhur në vitin 2010. Problemet me ligjin e kanë ndjekur 35-vjeçarin edhe gjatë kohës që ndodhej në burg, pasi është proceduar penalisht sepse është denoncuar nga një 16-vjeçare se e kërcënonte përmes mesazheve në Facebook.
Uka ka gjithashtu precedentë edhe për “dhunë në familje”, “drejtim mjeti pa patentë” dhe “grabitje me dhunë në bashkëpunim”.
Ndërkohë, policia ka identifikuar 37-vjeçarin Ermir Shabanaj si autorin e ngjarjes.
“Në lagjen nr.3, Sarandë, dyshohet se gjatë një konflikti për motive të dobëta, shtetasi E. Sh., 37 vjeç, ka goditur me mjet prerës (thikë) shtetasin B. U., 35 vjeç, i cili ndodhet në spital, jashtë rrezikut për jetën. Vijon puna për kapjen e autorit të dyshuar, shtetasit E. Sh., dhe sqarimin e plotë të rrethanave të ngjarjes”, njofton policia.
Ashtu si i plagosuri, edhe autori njihet si person me precedent penalë pasi më 25 qershor të këtij viti është arrestuar nga policia e Sarandës duke drejtuar mjetin në gjendje të dehur, ndërkohë që brenda në mjet iu sekuestrua edhe një thikë.
“E. Sh., 37 vjeç, banues në Tiranë, pasi është konstatuar nga shërbimet duke drejtuar automjetin në gjendje të dehur, gjithashtu gjatë kontrollit të automjetit këtij shtetasi iu gjet dhe sekuestrua një mjet prerës (thikë)“, njoftone policia asokohe.
Gjithashtu, Shabanaj në vitin 2013 ka qenë i arrestuar për “grabitje” në Tiranë.
