Në aksin Prishtinë-Beograd në javët e fundit, kryesisht pas samitit të Pragës ka pasur zhvillime të rëndësishme dhe nën “bekimin” e SHBA dhe BE pritet që të kemi një marrëveshje përfundimtare mes Kosovës dhe Serbisë.
Edhe pse i informuar për këtë nga dilpomacitë europiane dhe në takimin me ambasadorët e QUIN-it, duket se Presidenti i Serbisë, Aleksandër Vuçiç e ka të vështirë të pranojë realitetin e ri.
Ai gjithmonë e më tepër po ankohet duke thënë se presioni ndërkombëtar për marrëveshje me Kosovën është rritur mbi qeverinë e tij. Por pavarësisht kësaj Vuçiç vijon të mbrohet me tezë “Kosova është pjesë e Serbisë”, të cilën e përsëriti edhe në një tubim partiak në Leskovac.
“Nuk kërkojmë diçka nga ndokush, duam të jemi vetvetja, dhe Kosova është pjesë e Serbisë. S’do t’ju lejojmë të na e merrni Kosovën”, ka deklaruar Vuçiç.
Në një adresim të tij para mbështetësve partiakë, ata i kanë brohoritur “Vule (Vuçiç), mos e jep Kosovën” dhe në ekzaltim e sipër, Presidenti u përgjigj me një kërcënim për Perëndimin.
Vuçiç deklaroi se gjuha e arsyeshme e Serbisë nuk do të thotë se shteti që ai drejton është i dobët.
“Dua t’u tregoj diçka që ata e dinë shumë mirë – fakti që ne sillemi me përgjegjësi dhe flasim me seriozitet, nuk do të thotë se jemi të dobët. Sot, Serbia është shumë herë më e fuqishme në cdo aspekt se në vitin 1999 dhe 2012”, ka deklaruar ai.
Por Vuçiç shkoi edhe më tej duke provokuar BE dhe SHBA, teksa tha se “burrat serbë kur pinë pak raki, do të hynin në luftë me gjysmën e botës”.
