Një apartament është sekuestruar në kryeqytet, në bazë të një vendimi të Gjykatës së Lushnjes.
Policia bën me dije se banesa e vlerësuar 270 000 euro, në pronësi të 32-vjeçarit Marsel Korreshi, dyshohet se ishte përfituar nga para me prejardhje nga veprimtaria e drogës.
“Nga specialistët e seksionit për Hetimin e Krimeve Ekonomiko-Financiare të Drejtorisë Vendore të Policisë Fier, në bashkëpunim me Prokurorinë pranë Gjykatës së Rrethit Gjyqësor Lushnjë, u bë ekzekutimi i vendimit të Gjykatës së Rrethit Gjyqësor Lushnjë, i datës 03.10.2022, për vendosjen e sekuestros preventive ndaj pasurisë së shtetasit M.K., 32 vjeç, banues në Lushnjë, i dënuar më parë, për veprën penale ‘Prodhimi dhe shitja e lëndëve narkotike’. Nga veprimet hetimore rezulton se pasuria e 32-vjeçarit ka si burim veprimtari kriminale. Në zbatim të vendimit të Gjykatës u bë sekuestrimi i një pasurie të paluajtshme (apartament në Tiranë), me vlerë 270 000 euro”, njofton policia.
Vijojnë hetimet dhe verifikimet për evidentimin e pasurive të tjera që mund të jenë në emër të këtij shtetasi dhe të personave të lidhur me të, shtuan të njëjtat burime.
Korreshi rezulton të jetë arrestuar në Gusht 2017. Asokohe, policia njoftonte se: Në Lushnje, gjatë një operacioni, sekuestroi 22 doza kokainë, ndërsa arrestoi poseduesin. Në pranga ra Marsel Korreshi. Arrestimi i tij erdhi pas informacioneve se në lagjen ‘Çlirimi’ shpërndahej lëndë narkotike.
