Ish-kryeministri Sali Berisha ka deklaruar se qeveria e ka vrarë për herë të dytë 32-vjeçarin Lear Kurti duke tentuar të manipulojë shkakun e vdekjes.
Ai shprehet se autoritetet mashtruan duke deklaruar se i riu vdiq në spital, iu bë autopsia në 5 të mëngjesit në kundërshtim me ligjin dhe ngritën dyshime se ai humbi jetën nga gëlltitja e një qese me drogë.
Këtë pikë, Berisha e krahason me rastin e vrasjes së Klodian Rashës, kur policia njoftonte se gjeti një pistoletë në pellg me ujë pranë vendngjarjes, duke aluduar se i përkiste të ndjerit.
Reagimi
Në një postim në FB, Berisha shkruan:
Vrasja për së dyti e Leart Kurtit nga bandat me uniformë Rama-Çuçi.
Kokaina në stomakun e tij, si revolja në pellg e Klodian Rashës!
Të dashur miq,
Në një akt makabër, për të fshehur gjurmët e krimit të shëmtuar, Edi Rama dhe ministri i tij i familjes Bledi Çuçi janë vërsulur në mënyrën me kriminale për të përdhosur viktimën. Kështu, ata:
1- mashtruan me komunikata që i riu vdiq në spital ndërkohë që spitali deklaroi se i ndjeri u soll i vdekur në spital,
2- në kundërshtim flagrant me ligjin, ata i bënë të ndjerit autopsi në orën 5 të mëngjesit me një ekspert të vetëm nderkohë që autopsia duhej bërë vetëm 12 orë pas vdekjes dhe jo me një, por me një grup ekspertësh.
3- Në një akt kriminal ata i ‘gjetën’ në stomak një qese plastike me kokainë, pra njësoj si revolja në pellg për Klodian Rashën.
Duke i shprehur ngushëllimet më të ndjera familjes, miqve dhe të afërmeve të viktimës, dënoj si vrasje për së dyti krimin e shëmtuar të përdhosjes dhe manipulimit të viktimës së vrasjes shtetërore Leart Kurti dhe kërkoj largimin e menjëhershëm nga detyra të ministrit të familjes, Çuçi dhe ndëshkimin shembullor të xhelatëve që i morën shpirtin dhe atyre që e vranë për së dyti viktimën me manipulimet e tyre.
Versini i AMP
Përmes një reagimi, Agjencia e Mbikëqyrjes Policore ngriti dyshime se i riu i shoqëruar nga policia humbi jetën pasi gëlltiti një qese me drogë.
“Nga autopsia e kryer në Institutin e Mjekësisë Ligjore, rezultoi se në stomakun e viktimës është gjetur një qese plastike e çarë me ngjyrë të bardhë me përmasa 5×5 cm, e dyshuar si ambalazh i lëndës narkotike, e cila i është nënshtruar ekzaminimit në Institutin e Policisë Shkencore”, njofton AMP.
