Në morgun e Tiranës ka përfunduar ekspertiza mjeko-ligjore për 32-vjeçarin Lear Kurti, i cili ndërroi jetë në duart e efektivëve të patrullës së policisë që e shoqëroi për në Komisariatin Nr.3, pasi më parë e kishin ndjekur dhe ndaluar në zonën e “Don Boskos”.
Mësohet se familjarët e të riut kanë bërë tërheqjen e trupit të pajetë nga morgu dhe ceremonia mortore do të zhvillohet rreth orës 16:00 të ditës së sotme.
Familjarët e Lear Kurtit nuk janë prononcuar për mediat pas largimit nga morgu, ndërsa edhe para banesës së tij në rrugën “Kongresi i Lushnjës” miqtë e 32-vjeçarit ua kanë ndaluar gazetarëve që të afrohen.
Por, më herët gjatë ditës babai i tij Artur Isai, i cili rendte në dyert e morgut për të kërkuar informacion Learin, foli për Top Channel dhe akuzoi policinë se “e ka mbytur djalin”.
“Nuk e kam parë trupin e djalit, Kam qenë gjithë natën jashtë morgut dhe sot dhe nuk më kanë dhënë asnjë lloj shpjegimi”. Cilat autoritete? Ato që e kanë mbytur?! Ku ka këtu shtet. Gjeta ata të SHKB-së aty më thanë nuk dimë gjë, kur të bëhen ato… nga ora 10 ose 11 do të të themi”, tha babai i viktimës.
Ndërkohë, pritet që Ekspertiza të publikojë të dhënat që do të hedhin dritë mbi shkaqet e vdekjes së të riut, i cili mbërriti pa shenja jete në Spitalin e Traumës, teksa u transportua me një makinë të Uniformave Blu dhe jo ambulancë.
