Pedagogu i arteve Harri Aleksi, tha gjatë protestës që po mbahet sot në ambientet e jashtme të Universitetit Politeknik, se kërkesat janë jo vetëm legjitime, por edhe të vonuara dhe se i gjithë sistemi lëngon.
Ai shtoi se gjysma e rrogës së tij shkon për të siguruar literaturë shtesë pët studentët e tij dhe nuk di më ç’të bëj për të merituar rritjen e pagës.
Pedagogu tha gjithashtu se puna e Ramës lë për të dëshiruar sa i përket meritës, pasi ai ka disa ministra me plagjiaturë.
“Ne gjeneratat e pedagogëve të rinj mbështesim peticionin. Kërkesat janë jo vetëm legjitime, por edhe të vonuara. Sistemi lëngon sepse financimet për arsimin shkurtohen.
Kërkimi shkencor është lënë me më pak se gjysmën e financimit të kërkuar. kërkimi shkencor rrit cilësinë e mësimdhënies. Kërkimi shkencor ndikon dhe në sistemin e literaturës që i shërben studentit.
Unë jap lëndën e arteve dixhitale, ky zhanër nuk ka literaturë në Shqipëri.
Z. Kryeministër ju keni deklaruar për ne pedagogët se nuk e meritojmë rritjen e rrogës. Unë gjysmën e rrogës sime të pamerituar çdo muaj e shpenzoj për literaturë. Marr literaturë ekstra. Nuk e di se ç’duhet të bëj tjetër për merituar rrogën.
Nëse flasim për meritën, unë mendoj se puna juaj lë shumë për të dëshiruar sa i përket ministrave të emëruar me plagjiaturë. Mos vallë keni parasysh ministra të kabinetit tuaj kur thoni se pedagogët nuk e meritojnë rrogën?
Duhet të qëndrojmë fort për të realizuar kërkesat tona. Jemi këtu për gjërat që meritojmë dhe na mohohen”, tha pedagogu i Arteve.
