Deputeti Luçiano Boçi thotë se tashmë demokratët janë të qartë sa i përket rrugës që ato do të ndjekin kur bëhet fjalë për sheshimin e problematikave të brendshme.
Në një intervistë për “RTV ORA”, Boçi tha se nuk synojnë thjeshtë të bashkëpunojnë për zgjedhjet, por që të mos ketë më probleme brenda PD.
“Vullneti politik i sheshon të gjitha. Ajo që duam ne nuk është të kalojmë tek zgjedhjet, por bashkimi të jetë real. Mendime të ndryshme do të ketë por që ne në sjelljen tonë të brendshme të jemi solid. Janë vendosur afatet, jemi të qartë. Afatet janë përcaktim i etapave kohore në të cilat duhet të kalojë një proces bisedimesh. Në politikë gjithmonë nuk ke kohë, lufta nuk është vetëm me kundërshtarin por dhe me kohën”.
Për deputetin demokrat, mbajtja e protestave të mëdha dhe harmonizimi i tyre me proceset zgjedhore do të jepnin një produkt maksimal.
“Data 4 dhjetor është vendosur për zhvillimin e primareve. Të gjitha mesazhet që kanë ardhur janë mesazhe bashkimi, mendimet ndryshe apo pretendimet gjatë bisedimeve do të tentohet të konkludohen. Ka një organizim të vazhdueshëm për të pasur mbështetje ndaj protestave dhe në këtë dinamikë shohim që ka protesta. Janë bërë nga grupet e interesit dhe strategjia e ngritjes së frymës së mirë të protestës është e mirëpranuar. Janë disa lloj protestash të mos harrojmë as protestën e incineratorëve. Do të shkojmë dhe drejt protestave të mëdha kombëtare, protestat dhe përgatitja për zgjedhje, proceset zgjedhore shkojnë së bashku, nëse harmonizohen mirë produkti do të jetë maksimal”.
