Kryetari i Partisë Demokratike, Sali Berisha ka shprehur mbështetje të plotë në protestën e pedagogëve dhe studentëve në Tiranë.
Gjatë një postimi në rrjetet sociale, Berisha ka publikuar një video nga greva e arsimtarëve të cilët i kanë kërkuar qeverisë rritje të pagave në të njëjtin nivel me vendet e rajonit. Ndër të tjera Berisha dënon arrogancën dhe cinizmin e Ramës ndaj pedagogëve për të cilët i kërcënoi duke thënë se do t’i zëvendësojë me të huaj.
“Mbështetje të plotë pedagogëve dhe studentëve grevistë! Dënoj arrogancën, cinizmin dhe kërcënimin nga Edi Rama të pedagogëve me Vetting dhe studentëve me zëvendësimin e tyre me studentë të huaj! Të gjithë në protestë!”, shkruan Berisha teksa poston videon më poshtë.
Në një formë “karshillëku”, ashtu siç bëri rreth një javë më parë me anti-mitingun që realizoi në Universitetin Bujqësor, kreu i qeverisë Edi Rama ka thirrur sot në një takim rektorët e Universiteteve Publike dhe Jopublike.
Gjatë fjalës, Rama i mbylli përfundimisht derën rritjes së pagës për pedagogët, duke thënë se “ndryshimi me plus 15% që u bë një javë më parë është i fundit në historinë e Shqipërisë”.
