Në takimin që është duke zhvilluar me rektorët e Universiteteve publike dhe Jopublike, kryeministri Edi Rama ka ardhur me një propozim të ri në kuadër të sinergjisë dhe rrjetëzimit me arsimin universitar të Bashkimit Europian.
Rama ka propozuar shkrirjen e universiteteve të caktuar publike në një të vetme, në mënyrë që të plotësojnë njëra-tjetrën dhe të ndihmojnë në rankimin e tyre në rang ndërkombëtar.
Dhe një shkrirje që sipas Ramës është i realizueshëm dhe do të ishte efikas, është ai midis Universitetit të Mjekësisë dhe Universitetit të Tiranës. Edhe pse e pranoi se propozimi i tij do të prodhojë polemika, Rama theksoi se shtetit i takon që nga sot të ndërhyjë në këtë drejtim.
“Dua ta ndajmë bashkarisht këtë problem kaq serioz. Flasim për një sinergji evropiane. S’mund ta lemë këtë gjë për kur të hyjmë në BE, sepse është një gjeneratë tjetër pa mbështetjen e BE. Fjala vjen, një tjetër element për të rritur rankimin është pasja e një numri të caktuar universitetesh nën një ombrellë. Një shembull, shpresoj të mos kthehet në arsye për polemikë. UT mund të rritet me shpejtësi në rankimin e vet nëse ka brenda Mjekësinë. Këto janë dy Universitete të ndara dhe po prek Mjekësinë, që është krenaria e sistemit tonë akademik. Nuk mundemi dot ne që një vend kaq i vogël dhe me një potencial kaq të madh, të jemi me pikëpamje kaq gjeneraliste. Edhe për shkak të eksperiencës. Ajo që ndodh është që ne po humbasim kohë dhe vite duke pritur një gjë që nuk do të vijë kurrë”, tha kreu i qeverisë.
Kryeministri kritikoi më tej Universitetet duke thënë se fakti që Shqipëria gjendet para një papunësie rinore lidhet ngushtë me iluzionin e rremë që i kanë dhënë atyre se me diplomë do të jenë më shumë të predispozuar për t’u punësuar.
“Ndaj gjëja që na ndodh se gjendemi para një papunësie rinore, që sot është shumë më e ulët, por është papunësi e investuar sepse i ke dhënë një iluzion. I ke dhënë një diplomë, por për çfarë? Universitetet nuk mund të jenë skuadra futbolli”, shtoi kreu i qeverisë.
Në këtë mënyrë rrjedha e logjikës sipas Ramës të çon në faktin se shumë shpejt universitetet në rrethe do të bëhen filiale të Universitetit të Tiranës, pasi një student nga Tirana s’ka arsye pse të shkojë në një provincë të Shqipërisë.
“Të bëjnë një reflektim, janë të destinuar t’i bashkohen Tiranës dhe të jenë filiale të UT, nuk ka rrugë tjetër, ose janë të destinuara që të ndryshojnë komplet strategjinë. Për çfarë do të shkojë në provincë të Shqipërisë një student nga Tirana? Vetëm nëse atje merr diçka që nuk e merr dot në një vend tjetër”, theksoi Rama.
Rama vijoi më tej me kritika, duke thënë se të huajt e kanë pyetur sesi ka mundësi që një universitet si në Shqipëri i ka të gjitha degët dhe i bën të gjitha detyrat.
“Pa i hequr asgjë askujt, të krijojmë kushte që të gjithë të përfitojnë më shumë, duke u bërë shumë më tepër tërheqës. Gjëja që kemi parë dhe dëgjuar, për ta nxitur ndërkombëtarizimin, është se në 90% të rasteve jemi përballur me pyetjen, se përse ky universitet bën gjithë këto gjëra? Do ishte më mirë në 2, 3 drejtime. Kështu siç është ky sistem nuk na çon larg, na bën dhe më pak tërheqës, degë dhe dyer të caktuara të cilat detyrohen të ulen komplet pritshmëritë e atyre që marrin, duke thënë jo, një pjesë do e marr dhe me 5 se më duhet, ose me duhet t’i marr patjetër, si qenka kjo?”, shtoi Rama.
