Një debat i fortë ka ndodhur në Komisionin e Sigurisë mes përfaqësues të mazhorancës dhe të opozitës ku protagonist u bënë deputetët Pandeli Majko dhe Enkelejd Alibeaj.
Gjatë diskutimeve, Alibeaj kërkoi hapjen e të gjithë dosjeve si edhe të gjithçkaje që përmbajnë ato duke akuzuar socialistët se po mbronin ish-drejtuesit komunistë të vendit, gjë që ka shkaktuar reagimin e Majkos. Deputeti Socialist iu përgjigj Alibeajt se po diskuton në Komisionin e Sigurisë sikur të jesh një “adoleshent”.
“Nëpër dosje ka edhe detaje, të cilat ndoshta edhe i përndjekuri nuk do që t’i dijë sepse ka të përndjekur që janë detyruar të bëjnë spiunin. Tani vini ju dhe na thoni pas 30 vjetësh që mbrojmë këtë apo atë, kjo nuk ka logjikë. Vini dhe diskutoni këtu si adoleshentë”, tha Majo duke nxitur reagimin e Alibeajt.
“Ti je kokrra e komunistit dhe s’mund të na mbash leksion këtu”, tha Alibeaj, duke nxitur reagimin sërish të Majkos.
“Ik ore budalla..!”, tha Majko.
Debati shkoi deri aty sa ndërhyri edhe kryetarja e Komisionit të Ligjeve, Klotilda Bushka.
