Pasi u fshikullua nga kryeministri Rama për punë skandaloze në diplomaci, Ministri i Jashtëm Ditmir Bushati është vetëmbrojtur duke publikur një raport. Sipas këtij raport auditi, diplomatët shqiptarë nëpër botë janë përfshirë nga skandale korrupsioni dhe abuzimi me detyrën.
Raporti në fjalë, i botuar nga gazeta “Sot”, lë të kuptohet tentativa e Ministrit të Jashtëm Ditmir Bushati, për të justifikuar tonet e ashpra të bëra pak ditë më parë nga kryeministri Rama. Përballë opinionit publik, Bushati po krijon idenë se akuzat e përdorura nga shefi i tij Rama, vijnë pasi është vënë në dijeni për raportin.
Raporti bën fjalë për aktivitetin ekonomiko-financiar të vitit 2016 dhe, sikurse publikon gazeta “Sot”, audituesit e Ministrisë kanë konstatuar një sërë shkeljesh dhe abuzimesh me detyrën të ambasadorëve.
“ Në sistemin e Prokurimeve në ambasadat shqiptare jashtë vendit është gjetur mungesa e procedurave dhe formularëve të blerjeve me vlera të vogla, sipas kërkesave të Ligjit për Prokurimin Publik”, shkruan “Sot”.
Por është konstatuar gjithashtu se ambasadorët nuk kanë respektuar VKM 673, datë 11.09.2003 “Për të drejtat e punonjësve në përfaqësitë tona diplomatike” për pagat. Raporti i auditimit të Ministrisë së Jashtme ka zbuluar se ambasadorët kanë abuzuar me dietat.
Është konstatuar mungesa e një rregulloreje të brendshme, mungesë trajnimi për të ngarkuarit me mbajtjen e finances, abuzime në sistemin e programimit dhe zbatimit të buxhetit. Por edhe mungesa e sistemeve të kontrollit në lidhje me zbatimin e buxhetit dhe respektimin e limiteve buxhetore në total dhe për zëra të veçantë, mungesa e normativave në lidhje me shpenzimet korrente kryesisht për energji, ujë, ngrohje, karburant. Mungesa e udhëzimeve lidhur me përdorimin e financimeve të huaja dhe/ose sponsorizimeve nga donatorë të ndryshëm. Mangësi në drejtim të ngritjes së sistemeve të kontrollit për shpenzimet “pritje përcjellje”, thuhet në raportin e audituesve dikasterit të Punëve të Jashtëme, ku gjenden edhe udhëzimet që kjo ministri I’a ka adresuar përfaqësive diplomatike shqiptare nëpër botë.
Pavarësisht raportit të publikuar, Bushati ende nuk ka dhënë shpjegime se përse diplomacia e tij është degraduar deri në këtë pikë.
Nga Boldnews.al
