Në një deklaratë të befasishme vetëm 24 orë pas samitit të Pragës, ku Ballkani u ul si i barabartë në tryezë me vendet e BE-së në mbledhjen e parë të Komunitetit Politik Europian, Presidenti serb Aleksandër Vuçiç ka dhënë një deklaratë të befasishme nga Beogradi.
Ai tha për mediat se Kosova me shumë gjasë do të bëhet pjesë e Këshillit të Evropës dhe më shpejt seç ishte menduar.
Vuçiç zbuloi se procedurat për anëtarësimin e Kosovës në KE do të fillojnë me 2 apo 3 nëntor.
“Ajo që na pret është që më 2 apo 3 nëntor të fillojë procedura për pranimin e Kosovës në Këshillin e Evropës, po presin që anëtari hungarez të largohet nga Byroja e Komitetit të Ministrave dhe të zëvendësohet nga një anëtar lituanez dhe atëherë do të fillojnë procedurën që zgjat shumë, por me një rezultat të qartë që Kosova të hyjë në Këshillin e Evropës, nuk do të ushtrohej presion shtesë ndaj Serbisë”, deklaroi ai.
Sipas Presidentit të Serbisë, qëllimi është që Beogradi të lejojë pavarësinë e Kosovës edhe në kuptimin formal.
