Presidenti serb, Aleksandër Vuçiç ka folur para mediave rreth situatës politike të shtetit që përfaqëson në raport me zhvillimet botërore.
Ai është ndalur edhe tek raportet me Kosovën ku ka deklaruar se situata po komplikohet pasi që bashkësia ndërkombëtare po kërkon që Kosova të pranohet në Kombet e Bashkuara.
“Pozicioni ynë po bëhet gjithnjë e më i ndërlikuar, siç e kemi parashikuar me saktësi tetë muaj më parë, shtetet perëndimore do të përpiqen ta zgjidhin problemin e Kosovës ashtu siç mendojnë. Do ta zgjidhin në një mënyrë apo tjetër, duke e anëtarësuar në OKB. Arsyeja e dytë është pa dyshim që ia heqin Putinit argumentin e Kosovës, duke ia hequr atë si rast sui generis”, tha i pari i shtetit serb.
“Sot kemi një propozim nga Gjermania dhe Franca dhe duhet ta diskutojmë. Nuk mund ta hedhësh nga dritarja propozimin e dy vendeve më të forta, por nuk jam i sigurt nëse mund ta pranojmë këtë. Gabimi ynë më i madh është se pranuam që BE-ja të fillojë të menaxhojë procesin e zgjidhjes së çështjes së Kosovës. Ne ende nuk e kemi vënë seriozisht në rend dite çështjen e Asociacionit të Komunave Serbe”, nënvizoi Vuçiç.
Ai ka theksuar se propozimi i Francës dhe Gjermanisë është që Serbia të lejojë hyrjen e Kosovës në të gjitha organizatat dhe institucionet ndërkombëtare, përfshirë edhe OKB-në. Në këmbim, Serbia do të kishte një rrugë më të lehtë për në BE, por një sërë përfitimesh ekonomike.
“E gjithë ideja bazohet në faktin se ne nuk duhet ta njohim zyrtarisht Kosovën, por jemi dakord me anëtarësimin e Kosovës në OKB”, pohoi ai.
“Ne do të vazhdojmë të veprojmë në përputhje me normat juridike ndërkombëtare. Në këtë moment kemi tetë shënime për njohjen e Kosovës, do të vazhdojmë të bëjmë punën tonë, që është një punë tmerrësisht e vështirë për ne. Ne jemi shumë të vegjël për të luftuar me fuqitë e mëdha”, theksoi duke shtuar se nuk do të ketë vullnet për të pranuar vendimin për pavarësinë e Kosovës.
Kujtojmë se fjalimi i Vuçiqit vjen vetëm pak ditë pas marrjes së vendimit për pakon e gjashtë të sanksioneve të BE-së kundër Rusisë, nga e cila nuk do të përjashtohet as Serbia. Kjo do të thotë se nga 1 nëntori do të ndalohet dërgimi i naftës ruse përmes Gazsjellësit Adriatik (JANAF.
