Një tjetër banesë është grabitur në Vaun e Dejës. Policia bën me dije se grabitja ka ndodhur në orët e para të mëngjesit të djeshëm në fshatin Ashtë.
Policia tha se persona të panjohur kanë marrë një shumë parash brenda banesës dhe më pas janë larguar prej andej me një automjet tip “Benz” që ishte i parkuar në oborr.
“Më datë 5.10.2022, rreth orës 04:25, në fshatin Ashtë, Vau i Dejës, persona ende të paidentifikuar kanë vjedhur me dhunë në banesën e shtetasit Z. P., një shumë parash dhe automjetin tip ‘Benz’, i cili ka qenë i parkuar në oborrin e kësaj banese. Është ngritur menjëherë grupi hetimor dhe vijojnë hetimet intensive për zbardhjen e rrethanave të ngjarjes, identifikimin dhe kapjen e autorëve. Shërbimet e Policisë vijojnë kontrollin e zonës, me qëllim kapjen e autorëve”, sqaroi Policia.
Ky është rasti i dytë i grabitjeve brenda pak ditësh në qarkun e Shkodrës. Pak ditë më parë, një banesë në fshatin Kosmaç të Vaut të Dejës ishte vjedhur ku ishte marrë një shumë prej rreth 1 mijë eurosh.
