Monika Kryemadhi thotë se dosja e incineratorëve është thembra e Akilit ku kryeministri Edi Rama është kapur me “presh në dorë”.
Në emisionin “Ora e Betit”, ajo tha se SPAK është në pozicion shumë të vështirë. Deputetja e Partisë së Lirisë deklaroi se ka dijeni se ndaj SPAK po bëhet presion nga kryeministri Rama për të mos hetuar Erion Veliajn dhe Armando Subashin për incineratorin e Tiranës dhe atë të Fierit.
“Në dijeninë time SPAK i bëhet presion për Veliajn që mos ta hetojë, edhe për kryetarin e bashkisë Fier. I bëhet presion nga qeveria, Rama. Këta janë burra që nuk e mbajnë burgun, Lefteri i shkretë po e mban, nuk po i tregon bashkëpunëtorët”, deklaroi Kryemadhi.
“Inceneratori i Tiranës nuk është si Fieri dhe Elbasani ku likujdimet e parave kanë mbaruar. Inceneratori i Tiranës është një koncesion që vazhdon dhe sot, marrin para çdo ditë për mbetjet që depozitohen në Sharrë. Është makineri që lëvron para të përditshme”, shtoi Kryemadhi.
