Kryetari i Partisë së Lirisë, Ilir Meta ka denoncuar situatën skandaloze të plehrave të hedhura në zonën e Fllakës mes Durrësit dhe Tiranës e cila dëshmon një tjetër dëshmi të braktisjes së plotë të qytetarëve nga pushteti.
Meta ka postuar fotot në rrjetet sociale, teksa shkruan se pushteti lokal i Edi Ramës i ka lënë në “mëshirë të fatit” shqiptarët. Meta thotë se opozita e sotme do të rikthejë llogaridhënien dhe pushtetin lokal në duart dhe shërbimin e tyre.
Reagimi nga Ilir Meta:
“Situata skandaloze në zonën e Fllakës, mes Durrësit dhe Tiranës, është një tjetër dëshmi e qartë e përçmimit dhe e braktisjes së plotë të qytetarëve nga pushteti vendor i “Rilindjes”.
Kapja 100% e bashkive dhe parlamenteve lokale nga Edi Rama, natyrshëm që do të sillte këto rezultate: mungesë llogaridhënie, abuzime me fondet publike, mos dëgjim i zërit dhe i halleve të qytetarëve, braktisje të plotë të tyre deri edhe në falimentim të pushtetit vendor.
Rikthimi i pashmangshëm i opozitës dhe i pluralizmit politik në Bashkitë tona, në aleancë me qytetarët shqiptarë, do të rikthejë llogaridhënien dhe pushtetin lokal në duart dhe në shërbim të tyre”, shkruan Ilir Meta.
