Kryetari i Partisë së Lirisë, Ilir Meta ka përkujtuar ditën e lindjes së ish-Presidentit Bujar Nishani i cili ndërroi jetë para pak kohësh.
Gjatë një statusi në rrjetet sociale, Meta ka publikuar foton e Bujar Nishanit ndërsa në përshkrim thotë se ia ndien mungesën politikanit që i shërbeu për shumë vite shtetit shqiptar. Gjithashtu Meta shkruan se Nishani do të kujtohet gjithmonë për patriotizmin, integritetin, urtësinë dhe mençurinë e tij.
“Sot më 29 Shtator, përkujtojmë ditën e lindjes së Presidentit Bujar Nishani. Do të donim shumë që këtë 56-vjetor të lindjes ta festonim së bashku me Presidentin, mungesa e të cilit ka lënë një boshllëk të madh tek familjarët, të afërmit, miqtë, shokët dhe bashkëpunëtorët.
Presidentin Nishani do ta kujtojmë gjithmonë për patriotizmin, integritetin, urtësinë dhe mençurinë, vlera të cilat ai i shfaqi çdo ditë në detyrën e Kryetarit të Shtetit, por edhe në çdo detyrë tjetër dhe angazhim politik”, shkruan Ilir Meta.
Ish-presidenti i Shqipërisë, Bujar Nishani ka ndërruar jetë të shtunën e 28 majit 2022. Nishani fillimisht mori ndihmën mjekësore në spitalin ‘Shefqet Ndroqi’ dhe pas rëndimit të gjendjes shëndetësore, u dërgua në Gjermani për t’u kuruar nga një sëmundje e mushkërive, të cilën ia përkeqësoi Covid-19, por nuk ia doli të mbijetojë.
Bujar Nishani ishte 58 vjeç dhe ushtroi detyrën e Presidentit të Shqipërisë nga 24 korriku i vitit 2012 deri në 24 korrik të vitit 2017. Më herët ai kishte mbajtur poste të rëndësishme në qeveri, si ministër i Brendshëm dhe ministër i Drejtësisë.
