Kryetari i PS-së dhe kryeministri Edi Rama e ka zhveshur zyrtarisht Arben Ahmetajn nga çdo funskion në qeveri dhe Partinë Socialiste.
Pas mbledhjes së sotme të Kryesisë së PS-së erdhi konfirmimi i raportimeve që paralajmëronin shkarkimin e Ahmetajt edhe si drejtues politik për Qarkun e Vlorës. Udhëheqësi zgjodhi ta zëvendësojë me Blendi Klosin.
Shkarkimi i sotëm pason atë të 25 Korrikut, kur Rama e “fshiu” nga posti i zëvendëskryeministrit. Dhe vendimin e lajmëroi përmes një njoftimi në rrjetet sociale. Në vend të tij emëroi Belinda Ballukun.
Lëvizja shtoi zërat se kreu i qeverisë po e përgatiste për ta çuar në dyert e SPAK Arben Ahmetajn, i cilësuar nga opozita dhe jo vetëm si një prej pushtetarëve më të përlyerve në aferën e inceneratorëve.
Sjellja në kujtesë e zyrtarëve pranë Ramës që kanë përfunduar pas hekurave apo në bankat e gjykatës si të akuzuar, në të gjitha rastet ka një emërues të përbashkët: Rama është distancuar nga të gjithë duke shkarkuar e larguar subjektet në fjalë dhe duke u kujdesur të mëshojë se “përgjegjësia është personale”.
Kështu ndodhi me ish-ministrin Saimir Tahiri. Ai që Rama e quante “ministri kampion” u largua nga PS e tanimë ndodhet pas hekurave duke vuajtur një dënim të dhënë nga Apeli i GJKKO për shpërdorim detyre.
Ish-ministri tjetër Lefter Koka fitoi karrigen e deputetit nën siglën e PS në zgjedhjet e fundit parlamentare, por nuk e mori mandatin. Më pas erdhi arrestimi për aferën e inceneratorëve.
Rama u distancua nga ish-ministri i Mjedisit ashtu siç bëri edhe me kryebashkiakët e majtë të djegur nga dekriminalizimi.
Të njëjtin qëndrim po mban edhe me Arben Ahmetajn, ai që dikur shihej si një nga qeveritarët më të afërt me Ramën. Sot, megjithatë ia ka zhveshur funskionet dhe kështu, i mbetur vetëm me karrigen e deputetit, Arben Ahmetaj duket se po bëhet gati për një dimër të vështirë…
