Ilir Meta ka folur sot lidhur me bashkëpunimin me PD-në dhe zgjedhjet lokale të 2023.
Nga konferenca për shtyp e Kryetarit të Partisë së Lirisë, Meta i ka bërë një ftesë publike Sali Berishës duke thënë se PL është e gatshme të punojë me PD dhe të dalin me kandidatë të përbashkët. Ndër të tjera ai është shprehur se synimi është që opozita të fitojë.
Pyetje: Ju jeni pro daljes me një kandidat të përbashkët të opozitës në zgjedhjet vendore të 2023-it? Një përgjigje me po ose me jo.
“Në mënyrë të padiskutueshme! Më duket se e kam thënë dhe më përpara që për ne interesi kryesor është fitorja e opozitës në zgjedhjet vendore, është rivendosja e demokracisë vendore që është zeruar nga “rilindja”. Të mos harrojmë, katër vite një administrim katastrofik, 100% të pushteteve – “rilindja”! Kryetarë bashkish e kryetarë të këshillave bashkiake. U kthye në një bunker të vërtetë në raport me qytetarët. Zero transparencë dhe vetëm pasoja.
Shikoni pagat që janë nëpër bashki. Kisha një takim pak më parë me disa përfaqësues nga Korça dhe më thonë: “Nëpër bashki kanë mbaruar me mastera dhe i kanë rrogat nga 200 e ca mijë lekë të vjetra. Pse?! Se shtojnë vetëm vende pune për t’i mbajtur njerëzit peng.
Pra, i kanë kthyer vetëm në vende punësimi, por kuptohet punësim për t’i mbajtur njerëzit varur se ajo është lëmoshë, jo pagë dhe nuk mund t’i kërkosh as cilësi, as përgjegjësi; kjo skemë është në të gjithë Shqipërinë dhe ju e shikoni se si u fol me të madhe se ne po e bëjmë këtë reformë që të shkurtojmë numrin e punonjësve që të përmirësojmë shërbimet e sa më shumë të ardhura nga qytetarët për pushtetin vendor që t’i kalojmë në investime dhe… bilanci është katastrofik!
Ka më shumë të punësuar në pushtetin vendor nga “rilindja” sot në 60 e ca bashki se ka pasur në 400 e ca bashki e komuna, sepse është vetëm psikologjia e klientelizimit dhe marrja peng e njerëzve me rroga absurde dhe qesharake për efekte elektorale.
Kështu që përsa i takon asaj me “po” me “jo” – Po! Opozita duhet të dalë në të gjithë Shqipërinë me kandidatë të përbashkët! Kjo është më e mira për situatën sepse jemi në kushtet e një shteti mafioz dhe në kushtet e një shteti mafioz opozita duhet të paraqitet sa më e bashkuar, se në kushte të tjera, sa më shumë kandidatë, aq më mirë do të ishte për qytetarët!”, tha Meta.
