Varfëria sjell krim. Aksioma është përsëritur nga ish-ministri i Brendshëm Saimir Tahiri, i cili në një komunikim me një gazetar italian para arrestimit, lë të kuptohet se kultivimi i drogës në vendin tonë ka lidhje me varfërinë.
Nello Trocchia ka nisur së fundmi një projekt televiziv në Itali – “Mafia Connection”, me dokumentarë që kanë në qendër botën e krimit, që lidhjet okulte me politikën i ka të shpeshta.
“I Narcos Albanesi”, transmetuar mbrëmjen e djeshme, përcolli një prononcim të ish-ministrit Tahiri, tashmë pas hekurave në vendin tonë, i dënuar në Shkurt të këtij viti me 3 vjet e 4 muaj heqje lirie. Hetimi ndaj tij nisi në kuadër të dosjes së autoriteteve italiane pagëzuar “Habilaj”. Sipas akuzës, Tahiri kishte lidhje me grupin kriminal që merrej me trafik droge e armësh, të drejtuar nga Moisi Habilaj, kushëri i lartët me ish-ministrin. Megjithatë, gjatë procesit akuza ra dhe ai u dënua vetëm për shpërdorim detyre.
Në dokumentarin “I Narcos Albanesi”, gazetari italian shpjegon se e ka takuar Tahirin në një bar në Tiranë, disa ditë para arrestimit. Në bisedën me të, Tahiri mohon se ka qenë i korruptuar.
Shpërthimin në farmacinë e të atit e lidh me gjasme luftën që ka bërë ndaj drogës, edhe pse organe të ndryshme ligjzbatuese kanë faktuar një lulëzim të trafikut të narkotikëve dhe përfshirjen e policisë në këtë veprimtari kriminale, kur në krye të Ministrisë së Brendshme ishte Saimir Tahiri.
Për trafikun e drogës, shprehet se “këtu mariuhana nuk është një histori kriminelësh, është një histori varfërie”.
“Ish-ministri, thotë gazetari në dokumentar, na ka treguar pagat që narkotrafikantët u garantonin shqiptarëve, 5 mijë euro në vit vetëm për kultivimin e marijuhanës që në një vend të varfër si Shqipëria janë një shifër e konsiderueshme”.
Më tej, jepet prononcimi i një “narkotrafikanti”, i cili shprehet: “Nëse bën një punë normale, nëse punon fort mund të marrësh 300 euro në muaj. Me këtë jetë (trafikun e drogës), mund ti fitosh këto para në një minutë. Për këtë, shumë djem tërhiqen nga kjo jetë”.
