Gjykata e Shkallës së Parë Durrës, me kërkesë të prokurorisë ka caktuar “Sekuestro Preventive” për disa pasuri të Klejdi Abdylit dhe familjarëve të tij.
Vendimi, siç njoftohet këtë të Premte nga prokuroria, është marrë të Dielën e 18 Shtatorit. Sipas akuzës, vendimi është bazuar “në nenin 274 të K. Pr. Penale si dhe ligjin nr. 10192, datë 03.12.2009 ‘Për parandalimin dhe goditjen e krimit të organizuar, trafikimit, korrupsionit dhe krimeve të tjera nëpërmjet masave parandaluese kundër pasurisë’ (ndryshuar me ligjin nr. 24/2014, datë 20.03.2014, nr. 70/2017, datë 27.04.2017)”.
Pasuritë e sekuestruara janë:
• Garazhd me sipërfaqe 160.91 m2, ndodhur në Durrës, në pronësi të shtetasit I.A;
• Apartament me sipërfaqe 73.68 m2, ndodhur në Durrës, në pronësi të shtetasit I.A;
• Apartament me sipërfaqe 58.36 m2, ndodhur në Durrës, në pronësi të shtetasit I.A;
• Apartament me sipërfaqe 73.68 m2, ndodhur në Durrës, në pronësi të shtetasit I.A;
• Apartament me sipërfaqe 59.61 m2, ndodhur në Durrës, në pronësi të shtetasit I.A;
• Apartament me sipërfaqe 114.5 m2, ndodhur në Tiranë, në pronësi të shtetasit I.A dhe E.A;
• Apartament me sipërfaqe 69.92 m2, ndodhur në Durrës, në pronësi të shtetases E.A;
• Automjet me targa AA____, në pronësi të shtetasit K.A;
• Automjet me targa AA____, në pronësi të shtetasit K.A;
• Motomjet me targa AY____, në pronësi të shtetasit K.A;
• Automjet me targa AA____, në pronësi të shtetases Sh.A;
• Llogarinë në Bankën Kombëtare Tregtare, me valutë në Euro, në emër të shtetasit I.A;
• Llogarinë në Bankën Kombëtare Tregtare, me valutë në Euro, në emër të shtetasit I.N. A.
• Llogarinë në Raiffeisen Bank, me valutë në Euro, në emër të shtetasit I.N. A.
Aktiviteti në Itali
Klejdi Abdyli rezulton të jetë arrestuar nga policia e Durrësit në vitin 2019 me qëllim ekstradimi drejt Italisë, shtet që e kishte shpallur në kërkim ndërkombëtar.
“Abdyli ishte i shpallur në kërkim ndërkombëtar nga autoritetet italiane, bazuar në Urdhër Arrestin e vitit 2017, lëshuar nga Gjykata në Peskara/ Itali, për kryerjen e veprave penale ‘Trafikimi i narkotikëve (kokainë)’ dhe ‘Organizata Kriminale’. Ky shtetas në bashkëpunim me persona të tjerë dyshohet se në gjashtë raste të përsëritura, kanë mbajtur, transportuar dhe shitur sasi të konsiderueshme lënde narkotike të llojit kokainë”, njoftoi asokohe policia.
Sipas mediave italiane, ai ishte në krye të një grupi shqiptar me rol kryesor në shpërndarjen e drogës në lagjen “San Donato”, në Pescara.
Hetimi, sipas mediave italine, kishte çuar në arrestimin e 18 personave në total me sekuestrimin total të rreth 2 kg kokainë me destinacion sheshet e Rancitelli-t dhe San Donato-s në Pescara.
